Jylytý maýsymy bastalǵaly 650 úı órtendi - Astanada reıd ótti
ASTANA. KAZINFORM – Elordada jylytý maýsymy kezinde jer úılerde bolatyn órt, kómirqyshqyl gazynan ýlaný oqıǵalarynyń aldyn alýǵa arnalǵan profılaktıkalyq reıd ótti.
Shara Astanadaǵy №5 mamandandyrylǵan órt sóndirý bóliminde TJM qyzmetkerleriniń sapqa turýynan bastaldy. TJM Órtke qarsy qyzmet komıteti tóraǵasynyń orynbasary Erlan Tóregeldıev jıylǵan jurtqa bundaı sharanyń adamdardyń ómirine tónetin qaýipti seıiltýde mańyzy zor ekenin atap ótti.
Óz kezeginde, Astana qalasy TJD bastyǵynyń orynbasary Madııar Myrzageldıev reıd kezindegi is-áreketterdi bir pysyqtap ótip, tıisti nusqaýlar berdi.
Budan keıin órt sóndirý qyzmeti mamandary, jergilikti atqarýshy organ ókilderi, polıtsııa ınspektorlary, volonterlar jáne BAQ ókilderinen quralǵan top jeke turǵyn úıler ornalasqan aýdanǵa attandy.
Jer úılerdi aralaý barysynda órtke qarsy qyzmet mamandary peshti paıdalaný kezinde jiberiletin olqylyqtardy, órttiń shyǵýyna sebepshi bolatyn jaǵdaılardy aıtyp, túsindirý jumystaryn júrgizdi. Jylytý jabdyqtaryn, elektr quraldaryn paıdalaný kezindegi qaýipsizdiktiń negizgi erejelerin eske saldy. Úıiniń jylytý bóligi aýmaǵyn kórsetýge kelisim bergen turǵyndardyń peshi men murjasyn tekserip, qaýip bary anyqtalǵan jaǵdaıda, ony qalaı retteý keregin aıtty. Keıbir turǵyndarǵa ýly gaz taraǵan jaǵdaıda dabyl qaǵatyn qurylǵylar ornatyp berip jatty.
«Jylytý maýsymynda azamattardyń qaýipsizdigin qamtamasyz etý asa mańyzdy. Óıtkeni jylytý quraldary men peshti paıdalaný órt shyǵý qaýpin arttyrady. Biz adamdardy jylytý jabdyqtary men elektr qurylǵylarymen qaýipsiz jumys isteý erejeleri týraly habardar ete otyryp, profılaktıkalyq is-sharalardy belsendi júrgizýdemiz. Apattyń aldyn alý sharalary - qaıǵyly oqıǵalardy boldyrmaýdyń negizgi joly. Biz barlyq turǵyndardy osy jylytý maýsymy esh qıyndyqsyz ótýi úshin qarapaıym qaýipsizdik erejelerin saqtaýǵa shaqyramyz», - dedi TJM Órtke qarsy qyzmet komıteti tóraǵasynyń orynbasary Erlan Tóregeldıev.
Sondaı-aq, komıtet tóraǵasynyń orynbasary reıd barysynda eshqandaı aıyppul salynbaıtynyn, shara tek qulaǵdar etý, eskertý maqsatynda ótkizilip jatqanyn atap ótti.
Arnaıy qurylǵynyń arqasynda 248 adam qutqaryldy
TJM málimetinshe, jylytý maýsymyna daıyndyq aıasynda arnaıy mamandar áleýmettik osal azamattar turatyn 100 myńnan astam turǵyn úıdi aralaǵan.
Budan basqa, ákimdiktermen jáne eriktilermen birlesip turǵyn úılerde avtonomdy órt sóndirý qurylǵylaryn ornatý boıynsha jumystar belsendi júrgizilýde. 2020 jyldan bastap vedomstvo usynysy boıynsha jeke azamattardyń úıine 107 myńnan astam avtonomdy qurylǵy ornatylǵan. Olardyń ýaqtyly jumys isteýiniń arqasynda bıyl 248 adam qutqaryldy.
Al, bıyl áleýmettik turǵyda osal azamattardyń úılerine 14 myńnan astam jańa datchık ornatylǵan. Bul qurylǵy órt bolǵan jaǵdaıda dabyl qaǵady.
«Jylytý maýsymynda Tótenshe jaǵdaılar qyzmetkerleri jergilikti ákimdik, polıtsııa ınspektorlary, volonterlarmen birlese ártúrli profılaktıkalyq jumystar júrgizedi. Sonyń biri – búgingi reıd. Mundaı is-shara kezinde biz negizinen áleýmettik osal toptarǵa nazar aýdaramyz jáne ýly gazdy anyqtaıtyn datchıkter ornatamyz. Bundaı qurylǵylar ýly gazdyń kontsentratsııasy joǵarylaǵan kezde sıgnal beredi. Dabyldy estisimen turǵyndar úıinen dalaǵa shyǵyp, 101,102 nomerlerine habarlasýy kerek. Sol boıynsha nusqaýlyqtar júrgiziledi», - dedi Órtke qarsy qyzmet komıtetiniń bas mamany Eldos Zııada.
Bundaı qurylǵylardy adamdar ózderi de satyp alyp, ornata alady. Al, ákimdiktiń, qaıyrymdylyq qorlarynyń qarjysyna alynǵan bundaı qurylǵylardyń sany shekteýli, sondyqtan da olar áýeli áleýmettik jaǵdaıy tómen jandar turatyn úılerge tegin ornatylady.
Qurylǵy toqsyz, qýattandyrǵysh batareıalar kúshimen jumys isteıdi. Tek, ony ýaqtyly aýystyryp tursa, bolǵany. Ornatý da óte ońaı, árkim ózi qoldaný nusqaýlyǵyna qarap-aq ornata berýine bolady.
Jeke úıdegi órtke qandaı qatelik jıi sebep bolady?
Órt sóndirýshilerdiń aıtýynsha, jer úılerdegi órtke kóp jaǵdaıda jylytý peshin durys qoldanbaý sebep bolady. Peshti paıdalaný kezinde ketken olqylyqtan bólek taǵy bir sebep retinde myna statıstıkalyq derekti aıtýǵa bolady: órtten qaza bolǵandardyń úshten biri masań kúıde bolǵan. ıAǵnı, oqys oqıǵa bolar aldynda alkogoldik ishimdik ishken. Bul kóp jaǵdaıda áldebir qurylǵydan shyqqan aqaý emes, adamnyń ózi órt qaýipsizdigin saqtamaýy qaıǵyly jaǵdaıǵa soqtyratynyn kórsetedi.
Sondaı-aq, órt beıáleýmettik jaǵdaıda ómir súretin adamdar turatyn úılerde jıi shyǵatyny aıtyldy.
Volonterler órttiń aldyn alýǵa atsalysýda
Reıd kezinde top quramynda elordalyq volonterler de boldy. Olar buǵan deıin turǵyndarǵa órt qaýpin eskertý paraqshalaryn taratyp, úılerdi aralaýǵa atsalysqan eken.
«Bundaı sharalarǵa jazda da qatystyq, onda eskertý paraqshalaryn tarattyq. Al jylytý maýsymy bastalǵaly bul alǵashqy reıdimiz. Biz adamdarǵa kómekteskimiz keledi. Olardy qaýipten saqtaýǵa atsalysý – basty mindetimiz dep sanaımyz. 5-6 myńdaı volonter barmyz, bundaı jumystarǵa aldaǵy ýaqytta da qatysatyn bolamyz», - dedi 17 jastaǵy erikti Mılad Álimbekova.
Jylytý maýsymy bastalǵaly órtten 31 adam ajal qushqan
Órtke qarsy qyzmet komıtetiniń bas mamany Eldos Zııadanyń aıtýynsha, qaýipsizdikti arttyrý úshin jasalyp jatqan jumystarǵa qaramastan, jylytý maýsymynyń basynan beri Qazaqstanda turǵyn úı sektorynda 650 órt tirkelgen. Osy tosyn oqıǵalar kezinde 59 adam qutqarylǵan, ókinishke qaraı, 31 adam qaza tapqan. Al 20 azamatty kúıik shalyp, túrli dárejede tútinnen ýlanǵan.
Qandaı erejelerdi eskerý kerek?
Tótenshe jaǵdaılar mınıstrligi barlyq azamattarǵa órt qaýipsizdigi erejelerin qatań saqtaý qajettigin eskertedi. Ásirese, órt qaýpi edáýir artatyn jylytý maýsymy kezinde:
- jaramdy peshter men elektr qurylǵylaryn ǵana paıdalaný kerek;
- peshtiń qyzyp ketýine jáne elektr jelileriniń shamadan tys júktelýine jol bermeý kerek;
- murjany ystan ýaqtyly tazartý kerek;
- peshte jáne elektr qurylǵylarynda aqaý bar-joǵyn únemi tekserip otyrý kerek;
- pesh jaǵýdy balalarǵa tapsyrmaǵan jón;
- pesh jaǵý úshin tez tutanatyn suıyqtyqtardy paıdalanbaǵan abzal.
