Jylytý maýsymy bastalǵaly 1,3 mln-nan astam turǵyn úı tekserildi – TJM

ASTANA. KAZINFORM – Jylytý maýsymy bastalǵaly elimizde 1,3 mıllıonnan astam turǵyn úı aralanyp, turǵyndarmen órt qaýipsizdigi boıynsha túsindirý jumystary júrgizildi. Bul týraly QR Tótenshe jaǵdaılar mınıstrligi Órtke qarsy qyzmet komıteti tóraǵasynyń orynbasary Asqar Tóleshov málimdedi.

Onyń aıtýynsha, turǵyndardyń qalaýy boıynsha peshterdiń jáne elektr jelileriniń jaǵdaıy tekserilip, anyqtalǵan kemshilikterdi joıý jóninde usynystar berilgen.

– Profılaktıkalyq reıdterdiń nátıjesinde 110 myńnan astam turǵyn úı órtke qarsy qaýipsiz jaǵdaıǵa keltirildi, - dedi Asqar Tóleshov Ortalyq Kommýnıkatsııalar qyzmeti alańynda.

Sonymen qatar ol óz sózinde, áleýmettik osal toptarǵa erekshe kóńil bólinip jatyr. Ákimdikter men eriktilerdiń qatysýymen 2,5 myńnan astam úıde peshter jóndelip, qalypqa keltirildi, 12 myńnan astam murja tazalandy, 2,3 myń elektr jelisi jóndeldi dep atap ótti.

Budan bólek, turǵyn úılerge gazdyń jáne janý ónimderiniń qaýipti kontsentratsııasyn anyqtaıtyn arnaıy datchıkter ornatý jumystary jalǵasyp jatyr. Qazirgi tańda 41 myńnan astam datchık ornatylǵan.

– Burynǵy jylý berý maýsymdarynda, ıaǵnı 2019-2024 jyldar aralyǵynda osy datchıkterdiń ýaqtyly iske qosylýy shamamen 280 adamnyń ómirin saqtap qalýǵa múmkindik berdi, - dedi komıtet tóraǵasynyń orynbasary.

Vedomstvo ókiliniń málimetinshe, aǵymdaǵy jylý berý maýsymynda, ıaǵnı byltyr 1 qazannan bastap, el aýmaǵynda 2195 órt tirkelgen. Bul ótken maýsymmen salystyrǵanda 8 paıyzǵa az (2024 jyly – 2396). Qaza tapqandar sany 9 paıyzǵa tómendep, 107 adamdy qurady (2024 jyly – 118), al jaraqat alǵandar sany 7 paıyzǵa azaıyp, 79 adamǵa jetti (2024 jyly – 85).

Aıta keteıik, Atyraýda jylytý maýsymy bastalǵaly jer úılerde 30 márte órt tutanǵan. 

Sonymen qatar Astanada jylytý maýsymy bastalǵannan beri 55 órt tirkelgen.