Jylyoıda Jem ózenindegi jasandy bógetterdi buzý jumysy bastaldy

ATYRAÝ. KAZINFORM – Jylyoı aýdanynyń aýmaǵymen aǵatyn Jem ózenindegi jasandy bógetterdi buzý jumysy bastaldy. Bul – ózen arnasyn burý úshin jasalǵan qadam.

Atyraý oblysy ákiminiń orynbasary Qaırat Nurtaevtyń aıtýynsha, Jem ózeninen eldi mekenderge qaýip tóndirmes úshin jasandy bógetterdi buzý qolǵa alynǵan.

«Jylyoı aýdanyna tóngen qaýipti seıiltý maqsatynda Jem ózeniniń saǵalaryn ashyp jatyrmyz. Bul mańda kezinde kóptegen sharýa qojalyqtary sýdy jınap alý maqsatynda aǵys kózin bitegen. Jasandy bógetter turǵyzǵan. Bul Jem ózeniniń óz arnasymen aǵýyna aǵyp ketýine úlken kedergi keltirip otyr. Sol sebepten bitelgen saǵadardy ashý úshin jasandy bógetterdi buzý qolǵa alyndy», -dep habarlady Qaırat Nurtaev.

Eske sala ketelik, budan buryn tasqyn sý Qulsary qalasyna kire bastaǵanyn habarlaǵan bolatynbyz.

Atyraýdaǵy Qulsary qalasynan 12 myńnan astam adam evakýatsııalandy.

Sondaı-aq, Atyraý oblysynda evakýatsııalaý úshin 15 myń oryn daıyndalǵanyn jazǵan edik.