Jylyoı jastary «Jasyl el» baǵdarlamasymen qurylys jumystaryna tartylady

ATYRAÝ. KAZINFORM – Atyraý oblysynda «Jasyl el» eńbek jasaǵynan Jylyoı aýdanynyń jastary úshin qurylys baǵyty ashyldy. 

Atyraý oblystyq ishki saıasat basqarmasynyń bas mamany Áıgerim Qurmanberlıevanyń aıtýynsha, bıyl «Jasyl el» eńbek jasaǵy óńirdegi tótenshe jaǵdaıǵa baılanysty kógaldandyrý men abattandyrý jobalaryna tartylady.

«Jylyoı aýdanynyń jastary úshin qurylys baǵyty ashyldy. Jergilikti jastardan alǵash ret ashylǵan baǵytpen jumys isteýge jáne kógaldandyrýǵa 140 adam tartý kózdelip otyr. Qulsary qalasynda tasqyn sýdyń zardabyn joıý, ınfraqurylymdardy qaıtadan qalpyna keltirý maqsatyndaǵy jumystarǵa 18 ben 35 jas aralyǵyndaǵy jastar qabyldanady. Jumysqa qabyldanǵan jastar qurylys kompanııasymen kelisimshartqa otyrady. Olarǵa tólenetin eńbekaqynyń qarjysy «Jasyl el» eńbek jasaǵy men kelisimshartqa otyrǵan qurylys kompanııasynan bólinedi», - dep habarlady Áıgerim Qurmanberlıeva.

Onyń deregine súıensek, «Jasyl el» eńbek jasaǵyna 16-dan 35 jasqa deıingi 1 myń jasty jumysqa tartý josparlanǵan. Jastar Atyraý qalasy men oǵan irgeles ornalasqan 6 aýyldyq okrýgtiń aýmaǵynda jumys isteıdi.

Eske sala ketelik, budan buryn Qulsaryda jańa turǵyn úılerdiń qabyrǵasy qalanyp jatqanyn jazǵan bolatynbyz.