Jylyoıdaǵy munaı barlaý jumysy: Tájiǵalı ýchaskesinde alǵashqy uńǵyma qazylatyn boldy
ASTANA. KAZINFORM – Qazaqstanda Jylyoı karbonatty platformasy aýmaǵynda jańa munaı-gaz qorlaryn izdeý jumystary jalǵasyp jatyr. Qaratondaǵy alǵashqy izdestirý uńǵymasynan gaz aǵyny alynsa, Jylyoı ýchaskesinde 3D seısmıkalyq barlaý bastaldy. Bul týraly QR Energetıka mınıstrligi Kazinform agenttiginiń resmı saýalyna bergen jaýabynda málimdedi.
Jylyoı karbonatty platformasy Qaıran, Jylyoı, Tájiǵalydan Qaratonǵa deıingi perspektıvaly aýmaqtardy qamtıdy. Vedomstvo bul aımaqty jańa munaı-gaz qorlaryn izdeýdiń perspektıvaly baǵyttarynyń biri retinde qarastyryp otyr.
– Qazir «Qaraton tuzasty» ýchaskesinde tereńdigi 5750 metr bolatyn alǵashqy izdestirý uńǵymasy burǵylanǵan. Ony synaý kezinde gaz aǵyny alynǵan. Barlaý jumystary munymen toqtamaıdy. Qaratonda tereńdigi 6000 metrge deıin jetetin ekinshi izdestirý uńǵymasyn burǵylaýǵa daıyndyq júrip jatyr, - delingen mınıstrlik jaýabynda.
Sonymen qatar Jylyoı ýchaskesiniń 400 sharshy shaqyrym aýmaǵynda 3D seısmıkalyq barlaý jumystary bastaldy. Vedomstvo málimetinshe, joba qytaılyq CNOOC kompanııasymen 50/50 negizde júzege asyrylady. Barlaý kezeńindegi shyǵyndardy seriktes kompanııa qarjylandyrady.
– Platformanyń taǵy bir bóligi – Tájiǵalı ýchaskesinde kelesi jyly tereńdigi 5000 metr bolatyn alǵashqy izdestirý uńǵymasyn burǵylaý josparlanǵan. Bul jobany «Embimunaıgaz» arqyly júzege asyrý kózdelip otyr, - delingen mınıstrlik jaýabynda.
Osylaısha, Jylyoı karbonatty platformasynda geologııalyq zertteý birneshe baǵytta qatar júrgizilip jatyr: Qaratonda tereń uńǵymalar burǵylansa, Jylyoıda seısmıkalyq zertteý bastalǵan, al Tájiǵalıda alǵashqy izdestirý uńǵymasyn burǵylaý josparlanyp otyr.
