Atyraýdaǵy Jylyoı aýdany sharýalaryna tórt túlikti qaýipsiz aýmaqqa shyǵarý eskertildi

ATYRAÝ. KAZINFORM — Atyraý oblysynyń Jylyoı aýdanyndaǵy sharýalarǵa tórt túlikti qaýipsiz aýmaqqa shyǵarý eskertildi.

Atyraý oblysynyń tótenshe jaǵdaı jónindegi jedel shtabynyń málimetinshe, Jylyoı aýdanynda 459 sharýa qojalyǵynda 20 myńǵa jýyq múıizdi iri qara, 93 myń qoı men eshki, 21 myń jylqy, 11,5 myń túıe tirkelgen.

Jylyoı aýdanynyń ákimi Jumabek Qarajanovtyń aıtýynsha, mal sharýashylyǵymen aınalysatyn sharýa qojalyqtarynyń jetekshileri men turǵyndarǵa áleýmettik jeli arqyly eskertý berilgen. 

— Sharýalarǵa maldy tasqyn sý barmaıtyn qyratty ári qaýipsiz aýmaqqa kóshirý usynyldy. Olarǵa maldy ýaqytyly baqylaý, jergilikti atqarýshy organdardyń ókilderimen turaqty baılanysta bolý mindetteldi, — deıdi Jumabek Qarajanov.

Ákimniń aıtýyna qaraǵanda, Jem ózeniniń bir tarmaǵy — Doraly kanalynan Qyzyljar ýchaskesine sý shyǵady. Bul mańda birneshe sharýa qojalyǵy bar.

— Qulsary qalasynyń baǵytynda, Jem ózeniniń sýy jaıylýy múmkin ózge de aýmaqtarda ornalasqan sharýalardyń barlyǵyna habarlandy. Negizgi josparymyz — qaýip tóngen jaǵdaıda Qulsary jaq bettegi sharýashylyqtardyń malyn saqtap qalý. Qarsy betke sý shyqsa, jaıylymǵa, egistikke barady. Odan qatty qaýip joq. Sý deńgeıi turaqtalǵannan keıin jaıylymdyq alqapqa sýdy kezeń-kezeńimen jiberetin bolamyz, — deıdi Jumabek Qarajanov.

Eske sala keteıik, buǵan deıin Jem ózenimen Jylyoı aýdanynyń aýmaǵyna kelip jatqan sýdyń aǵysy qatty ekenin habarlaǵan edik.