Jylyoı aýdanyndaǵy eldi mekenderdi tasqynnan qorǵaý úsh 3 deńgeıli bóget salyndy
ATYRAÝ. KAZINFORM – Atyraý oblysyndaǵy Qulsary qalasy men eldi mekenderdi Jem ózenindegi tasqyn sýdan qorǵaý úshin 3 deńgeıli bóget salynǵan.
Atyraý oblysy ákiminiń orynbasary Qaırat Nurtaevtyń aıtýyna qaraǵanda, Jem ózeniniń Jylyoı aýdaǵyndaǵy arnasy 2,5 metrge tereńdetilgen. Al eni 50 metrge keńeıgen.
– Bizdiń basty maqsatymyz – Jylyoı aýdanynyń ortalyǵy – Qulsary qalasy men eldi mekenderdi tasqyn sýdan qorǵap qalý. Jem ózeniniń Aqkıiztoǵaıdan Turǵyzba aýylynyń aralyǵyna deıingi túbi, sý aıdynynyń Kaspıı teńizine quıatyn saǵasy tereńdetildi. Bul shamamen 50 shaqyrymdy quraıdy, - deıdi Qaırat Nurtaev.
Onyń aıtýynsha, Jem ózeniniń jaǵalaýynda 3 deńgeıli bóget salynǵan. Onyń uzyndyǵy – 100 shaqyrymǵa jýyq.
– Birinshisi, Jem ózeniniń túbin tereńdetý kezinde alynǵan topyraqpen tóseldi. Ekinshi, bóget respýblıkalyq mańyzy bar Atyraý-Dossor-Beıneý-Aqtaý tas jolynan Aqkıiztoǵaı aýylyna deıingi 65 shaqyrym aýmaqta soǵylyp jatyr. Bógettiń eni – 20, bıiktigi – 6 metr. Jańadan salynyp jatqan bóget ár 50 metr saıyn nyǵyzdalady. Qazir onyń 78 paıyzy aıaqtaldy. Byltyrǵy kóktemde Qulsary qalasyn tasqyn sýdan qorǵaý úshin bóget salynǵan edi. Bul – úshinshi bóget. Osy bóget qaıta nyǵaıtyldy. Bıyl ózendegi tasqyn sý úsh deńgeıli bógetten ótpeıtinine senimdimiz, - deıdi Qaırat Nurtaev.
Oblystyq qurylys basqarmasynyń basshysy Nurbergen Qusaıynovtyń málimetinshe, Qursaı ózeginiń 46,1 shaqyrym túbin tereńdetý kózdelgen. Osy kezge deıin ózektiń Qulsary qalasyna deıingi bóligi tereńdetilgen.
– Qazir Qursaı ózeginiń Qulsary qalasynyń aýmaǵyndaǵy bóligin tereńdetý qalyp tur. Soǵan baılanysty Jem ózeninen Qursaıǵa quıar tusy ýaqytsha jabyldy. Kóktemgi tasqyn sý tek Jem ózeni arqyly aǵyp jatyr. Sý tasqyny kezeńi aıaqtalǵan soń Qursaı kanalynyń Qulsary qalasyndaǵy bóliginiń túbi tereńdetý jalǵasady. Ózenniń atalǵan kanalǵa quıatyn tusyna sý retteıtin úlken shlıýz ornatylady, - dedi Nurbergen Qusaıynov.
Eske sala ketelik, buǵan deıin Jem ózenimen Jylyoı aýdanynyń aýmaǵyna kelip jatqan sýdyń aǵysy qatty ekenin jazǵan edik.