Jylyoı aýdanynan 30 myńǵa jýyq adam evakýatsııalandy
ATYRAÝ. KAZINFORM – Sý tasqynyna baılanysty Atyraý oblysynyń Jylyoı aýdanynan 30 myńǵa jýyq adam evakýatsııalandy. Onyń ishinde Turǵyzba aýylynyń 430 turǵyny bar.
Jylyoı aýdandyq ákimdiginiń málimetinshe, Turǵyzba aýylynyń turǵyndaryn evakýatsııalaý bastalǵan. Munda 3 518 adam turady.
«Aýdan ákimi Jumabek Qarajanov aýyl turǵyndarymen kezdesip, evakýatsııalaýdyń mańyzyn túsindirdi. Birinshi kezekte áıelder men, balalardy, múmkindigi shekteýli jandar men zeınetkerlerdi evakýatsııalaý qolǵa alyndy. Aýyldan 430 adam evakýatsııalanyp, «Qazaqstan temirjoly» UK poıyzymen Mańǵystaý oblysyna jiberildi. Olardyń arasynda 173 bala, 15 zeınetker bar», - dep habarlady aýdandyq ákimdikten.
Sondaı-aq, tasqyn sý basqan Qulsary qalasynyń turǵyndaryn evakýatsııalaý jalǵasyp jatyr. Keshe keshkisin monoqaladan 147 adam evakýatsııalandy.
«Qulsary qalasynyń 50 turǵyny Mańǵystaý oblysyna jiberildi. Al, 97 adam «Teńiz» ken ornyndaǵy vahtalyq qalashyqqa kóshirildi», - dep málim etti aýdandyq ákimdikten.
Eske sala ketelik, budan buryn Atyraý oblysynda evakýatsııalaý úshin 15 myń oryn daıyndalǵanyn jazǵan edik.
Tasqyn sý qaýpi Qulsary qalasynyń 7 shaǵyn aýdanyna tónip turǵanyn habarlaǵan bolatynbyz.
«Teńiz» kenishindegi vahtalyq qalashyqqa 6,5 myńnan astam adam evakýatsııalanǵan edi.
