Jylyna 450 myń tonna: SQO-da ósimdik maıyn óndiretin zaýyt salynady
ASTANA. KAZINFORM — Soltústik Qazaqstan oblysynda halyqaralyq agroónerkásiptik holdıng Tiryaki Agro kompanııasynyń qatysýymen aýqymdy ınvestıtsııalyq joba júzege asyrylatyn bolady. Atalǵan kompanııa Qyzyljar arnaıy ekonomıkalyq aımaǵy aýmaǵynda ósimdik maılaryn óndirý óndirisin jolǵa qoıýdy josparlap otyr. Bul týraly AShM málim etti.
Onda jylyna 450 myń tonnaǵa deıin daıyn ónim shyǵaratyn zamanaýı maı ekstraktsııalaý zaýytyn salý kózdelgen. Kásiporyn Ortalyq Azııadaǵy eń iri zaýyttardyń biri retinde sanalyp, óńirdiń aýyl sharýashylyǵy ónimderin qaıta óńdeý salasynyń damýyna eleýli úles qosady dep kútiledi.
— Zaýytta kúnbaǵys, raps jáne zyǵyr maıyn óndiriletin bolady. Táýligine 1 500 tonnaǵa deıin shıkizat óńdeledi, — delingen habarlamada.
Jobany osy óńirde júzege asyrýǵa shıkizat qorynyń moldyǵy (kúnbaǵys, raps jáne zyǵyr óndirisi bar), sondaı-aq óńirdiń geografııalyq turǵydan qolaılylyǵy yqpal etti.
Bul logıstıkalyq máselelerdi jeńildetip, negizgi ótkizýshi naryqtarǵa shyǵýǵa múmkindik beredi.
Aıta keteıik, buǵan deıin Kókshetaýda jylyna 300 myń tonna ósimdik maıyn óndiretin zaýyt salynatynyn jazdyq.
