Jylyna 35 myń lıtrge deıin únem: mınıstrlik turmysta sýdy únemdeý boıynsha usynys ázirledi

ASTANA. KAZINFORM — Qoǵamda sýdy utymdy paıdalaný mádenıetin qalyptastyrý maqsatynda Sý resýrstary jáne ırrıgatsııa mınıstrligi turmystyq jaǵdaıda sýdy únemdeýge arnalǵan ádistemelik usynystar ázirledi.

Usynysqa mynalar kiredi: kir jýǵysh jáne ydys jýǵysh mashınalardy tek tolyq júktememen paıdalaný, tisti jýǵanda krandy jaýyp, staqanmen sý paıdalaný, vanna qabyldaýdyń ornyna qysqa dýsh qabyldaý, kókónis pen jemisterdi ydystaǵy sýmen jýý, avtomatty sensorly krandardy qoldaný, ýnıtazdarǵa eki deńgeıli sý jiberý júıesin ornatý; sý aǵynyn retteıtin arnaıy saptamalar (aeratorlar) paıdalaný, sondaı-aq krandardaǵy aqaýlardy únemi baqylap, sýdyń aǵýyn der kezinde joıý.

Bul usynystardy tolyǵymen qoldaný arqyly alty adamnan turatyn bir otbasy jylyna 35 myń lıtrge deıin sý únemdeı alady. Mınıstrlik ázirlegen usynystar kórsetilgen bannerlerdi jergilikti atqarýshy organdardyń qoldaýymen Qazaqstannyń barlyq óńirindegi kóshelerde, bilim berý mekemelerinde, temirjol vokzaldarynda, áýejaılarda jáne basqa da qoǵamdyq oryndarda ornalastyrý josparlanyp otyr.

— Biz turmysta sýdy únemdeýdiń mańyzyn múmkindiginshe kóp adamǵa jetkizgimiz keledi. Árbir azamat eldiń sý resýrstaryn saqtaýǵa úles qosa alady. Mınıstrlik ázirlegen usynystar sýdy únemdeý — ońaı ári tıimdi ekenin kórsetip otyr. Endi biz aqparattyq-túsindirý jumystaryn kúsheıtip, bul qarapaıym tásilder týraly Qazaqstannyń barlyq óńirine jetkizýdi kózdep otyrmyz, — dedi Sý resýrstary jáne ırrıgatsııa mınıstri Nurjan Nurjigitov.

Eske sala keteıki, sý sharýashylyǵy mamandarynyń kásibı merekesine oraı arnaıy marapat tabystaý saltanatynda Prezıdent «Qazaqstan úshin sý — ulttyq qaýipsizdik máselesi» ekenin aıtqan edi.