Jylyna 1 mln tonna metallýrgııalyq koks óndiretin jańa óndiris iske qosylady
ASTANA. KAZINFORM – Qazaqstanda qýaty jylyna 1 mln tonna bolatyn metallýrgııalyq koks óndiretin jańa óndiris iske qosylady. Bul týraly Úkimettiń baspasóz qyzmeti habarlady.
Memleket basshysy Qasym-Jomart Toqaev ekonomıkany ártaraptandyrý jáne joǵary qaıta bólý klasterlerin qurý jónindegi tapsyrmalaryn júzege asyrý aıasynda Qazaqstan Respýblıkasynyń Úkimeti Energetıka mınıstrligi men «Kazakhstan Success Coking Energy» JShS arasyndaǵy Qaraǵandy oblysynda metallýrgııalyq koks óndiretin zaýyt salý boıynsha ınvestıtsııalyq kelisimdi maquldady. Premer-mınıstr Oljas Bektenov tıisti qaýlyǵa qol qoıdy.
Joba Qaraǵandy oblysy Abaı aýdany Dýbovka kentinde qýaty jylyna 1 mln tonnaǵa deıin metallýrgııalyq koks óndiretin kásiporyn salýdy kózdeıdi. Jeke ınvestıtsııalardyń jalpy kólemi – 63,5 mlrd teńge. Kásiporynda 500-ge deıin turaqty jumys orny ashylady, al jerasty kenishiniń qurylysy qosymsha 500 jumys ornyn qamtamasyz etedi.
Zaýyt qurylysy kómir shıkizatyn tereń óńdeýdi damytýǵa, joǵary qosylǵan quny bar ónim shyǵarýǵa jáne Qazaqstannyń ónerkásiptik áleýetin nyǵaıtýǵa baǵyttalǵan. Kómir hımııasy ónimderi energetıka, aýyl sharýashylyǵy, metallýrgııa, farmatsevtıka jáne basqa da salalarda keńinen qoldanylady. Іshki naryq tolyq qamtylǵan soń, artyq ónim eksportqa shyǵarylady.
Óndiristi iske qosý 2029 jylǵa josparlanǵan. Alǵashqy kezeńde qýaty jylyna 500 myń tonnaǵa deıin koks óndirýge múmkindik beredi. 2031 jyldyń sońyna qaraı kásiporyn tolyq jobalyq qýatyna shyǵyp, jylyna shamamen 1 mln tonna metallýrgııalyq koks óndirýdi josparlap otyr.
Sondaı-aq ınvestor qurylys barysynda otandyq óndirýshilerdiń taýarlaryn, jumys kúshin jáne qyzmetterin paıdalanýǵa basymdyq berýge mindetteme alady. Bul qazaqstandyq jetkizýshilerdiń júktemesin arttyryp, jobanyń aralas salalarǵa ekonomıkalyq iserin kúsheıtýge múmkindik beredi.
Joba Qazaqstannyń ındýstrııalyq bazasyn damytý úshin mańyzdy: ol jeke ınvestıtsııalar tartý, jańa jumys oryndaryn ashý, otandyq jetkizýshilerdi qoldaý jáne qosylǵan quny joǵary ónim óndirý mindetterin biriktiredi.
Aıta ketelik qara metallýrgııa salasyndaǵy jobalar aıasynda 10 myńnan astam jumys orny ashylatyny týraly jazǵan edik.
