Jyldyń tórt mezgilin sezinýge bolady — Qazaqstanǵa keletin arab týrısteri kóbeıip keledi

ASTANA. KAZINFORM — Qazaqstan Taıaý Shyǵys saıahatshylary úshin tartymdy baǵytqa aınalyp keledi. Ornalastyrý oryndary boıynsha derekterge súıensek, ótken jyly Parsy shyǵanaǵy elderinen kelgen týrıster qatary 53% kóbeıdi, dep habarlaıdy Kazakh Tourism ulttyq kompanııasy.

Bul protsesti qoldaý jáne qyzyǵýshylyqty arttyrý maqsatynda óńirdiń iri týroperatorlarymen yntymaqtastyq kúsheıtilip jatyr.

Birikken Arab Ámirlikteriniń iri týroperatorlary Almaty qalasy men Almaty oblysynyń tabıǵı jáne mádenı murasymen tanysyp, etnoaýyl, Oi Qaragai jáne Shymbulaq taý kýrorttaryn, «Sharyn» jáne «Kólsaı kólderi» ulttyq parkterin aralady.

Meımandar jazda jaıly demalys izdeıtin BAÁ týrısteri úshin Qazaqstannyń aýa raıy men tabıǵaty erekshe tartymdy ekenin atap ótti.

— Men bir sapardyń ózinde jyldyń tórt mezgilin sezindim. Qalada — jaz ben ystyq, taýda — qar, al oblysta — jańbyr men kóktemgi kóńil-kúı. Bul — naǵyz sıqyr boldy, — dep óz áserimen bólisti Mansı Sharma Datta.

BAÁ-den kelgen týroperatorlar qazaqtyń ulttyq taǵamdary men qonaqjaılyǵyna joǵary baǵa berdi. Olar elimizdegi belsendi demalys, ekotýrızm jáne otbasylyq baǵyttardy damytý múmkindikterine basa nazar aýdaryp otyr.

Sapar sońynda Almaty qalasynda B2B kezdesýler ótip, 20-dan astam qazaqstandyq týroperatorlar arab áriptesterimen týrıstik ónimderdi ilgeriletý jáne uzaqmerzimdi yntymaqtastyq múmkindikterin talqylady. Bul Qazaqstannyń BAÁ men Parsy shyǵanaǵy elderinen keletin saıahatshylar úshin tartymdylyǵyn arttyrady.

Qazaqstanǵa sapar nátıjesinde BAÁ týroperatorlary óz klıentterine usynatyn týrpaketterdi keńeıte alady.

Buǵan deıin Premer-Mınıstr Oljas Bektenov Almatyǵa jumys sapary barysynda Shymbulaq, Oı-Qaraǵaı, Pıoner, Qımasar jáne Býtakovkaǵa kiretin ortalyq aımaqty damytý josparymen tanysqan edi.