Jyldyq jeke tabysy 40 mln teńgeden asatyndardyń salyǵy artady
Ulttyq ekonomıka mınıstri Álibek Qýantyrov progressıvti tabys salyǵy shkalasy jyldyq tabysy 40 mln teńgeden asatyndarǵa qoldanylatynyn aıtty, dep habarlaıdy Kazinform.
«Sán-saltanat salyǵyna kelsek, bul salyq negizinen múlikke salynady. Oǵan baǵasy qymbat kólik quraldary, jeke menshiktegi ushý apparattary, qymbat jyljymaıtyn múlik nysandary jatady. Negizinen osyndaı tásil qoldanylady», - dedi mınıstr
Vedomstvo basshysy sán-saltanat salyǵy qymbat múlik tutynýshylarǵa ǵana baǵyttalatynyn eske saldy.
«Ol múlikter negizinen ımporttyq ónim bolyp esepteledi. ıAǵnı, olardy Qazaqstan aýmaǵyna kirgizer aldynda tirkeý kezinde salynady», - dedi Álibek Qýantyrov.
Sondaı-aq, ol progressıvti salyq shkalasy jańa Salyq kodeksinde qalaı jumys isteıtinin túsindirdi.
«Bizde kezinde 4 satyly progressıvti salyq shkalasy bolǵanyn durys aıttyńyz. Progressıvti salyq júıesi 5 paıyzdan 20 paıyzǵa deıin bolatyn. Al bul joly negizinen 10 paıyzdyq tegis shkalany qaldyrý usynylyp otyr. Oǵan qosymsha 15 paıyzdyq progressıvti salyq salynady. Onyń kólemi jylyna 480 eń tómengi aılyq kórsetkishi kóleminde bolady. Bul shamamen 40 mln teńge. Eger odan artyq bolsa, ıaǵnı, 50 mln teńge tapsa, 10 mln teńgeden artyq tabysyna 15 paıyz tóleıdi. Bul halyqtyń az bóligin ǵana qamtıdy jáne kóleńkeli ekonomıkanyń artýyna túrtki bolmaıdy. Óıtkeni mundaı aılyqty tabysy joǵary sektorlarda ǵana tóleıdi. Bul salalarda salyq júıesi ashyq, móldir. Baıypty salyq tóleýshiler qatysady», - dedi Ulttyq ekonomıka mınıstri.
