Jyldyq ınflıatsııa jeti aı qatarynan tómendep keledi – Ulttyq bank

Jyldyq ınflıatsııa 7 aı qatarynan tómendep keledi. Bul týraly Úkimet otyrysynda Ulttyq bank tóraǵasynyń orynbasar Berik Sholpanqulov aıtty, dep habarlaıdy Kazinform agenttiginiń tilshisi.

«Jyldyq ınflıatsııa jeti aı qatarynan tómendep keledi. Onyń búgingi deńgeıi – 11,8 paıyz. Jyldyq ınflıatsııa qatań aqsha-kredıt saıasaty jaǵdaılary men 2022 jylǵy joǵary bazanyń aıaqtalýy, jahandyq ınflıatsııalyq qysym men óndiris shyǵyndarynyń tómendeýi aıasynda baıaýlady. Inflıatsııa qurylymynda barlyq komponenttiń ósý qarqyny baıaýlady. Aılyq ınflıatsııa da 0,6 paıyzǵa deıin báseńdedi. Alaıda, aılyq ınflıatsııanyń ósý qarqyny áli de ortasha mánnen aıtarlyqtaı joǵary qalyptasyp keledi», - dedi UB tóraǵasynyń orynbasary.

Onyń atap ótýinshe, azyq-túlik ınflıatsııasy 11,4 paıyzǵa deıin tómendedi.

«Sebebi nan, jarma, sút ónimderi, et pen qant baǵasynyń ósý qarqyny da tejeldi. Aýyl sharýashylyǵy salalarynda da tamaq ónimderin óndirýshilerdiń baǵany tómendetkeni sezildi. Jemis-jıdek pen kókónis maýsymdyq kezeńge baılanysty arzandady. Biraq onyń arzandaý qarqyny ádettegiden tómen. Osylaısha, azyq-túlik taýarlarynyń aılyq ınflıatsııasy ótken jyldarmen salystyrǵanda joǵary qalyptasyp otyr», - dedi Berik Sholpanqulov.