Elena Rybakına: Jyldy álemniń birinshi raketkasy retinde aıaqtaý — men úshin úlken qýanysh
ASTANA. KAZINFORM — Qazaqstandyq tennısshi Elena Rybakına 2026 jyldyń qorytyndysy boıynsha Áıelder tennısi qaýymdastyǵynyń (WTA) jekeleı syndaǵy reıtıngisinde birinshi orynmen aıaqtaıdy.
Tokıodaǵy WTA 500 týrnıriniń ekinshi aınalymynda ıÝlııa Pýtıntsevany jeńgennen keıin Elena maýsym sońyna deıin eń basty qarsylastaryna jetkizbeıtin boldy.
Qazaqstan tennıs federatsııasynan málim etkenindeı, Rybakına — jyl qorytyndysy boıynsha áıelder arasyndaǵy jekeleı reıtıngte kósh bastaıtyn Azııa eliniń tuńǵysh ókili.
Osylaısha, onyń jetistigi Qazaqstan úshin ǵana emes, búkil Azııa tennısi úshin tarıhı oqıǵaǵa aınaldy.
Elena maýsymdy álemniń birinshi raketkasy retinde aıaqtaıtynyna qatysty áserimen bólisip, jankúıerlerine qoldaýy úshin alǵys aıtty.
- Jyldy álemdik reıtıngtiń birinshi satysynda aıaqtaıtynyma óte baqyttymyn. Osyǵan oraı jyl boıy maǵan qoldaý kórsetken barshańyzǵa raqmet. Kelesi jyly da osyndaı joǵary deńgeıde óner kórsetýdi jalǵastyra alamyn dep úmittenemin, — dedi Rybakına.
Maýsymdy birinshi orynda aıaqtaý — álemdik reıtıngtiń barlyq kóshbasshysyna birdeı buıyrmaǵan jetistik. Japonııalyq Naomı Osaka WTA reıtınginde kósh bastaǵanymen, jyl qorytyndysy boıynsha birde-bir ret álemniń birinshi raketkasy atanbaǵan. Reseı atynan óner kórsetken Marııa Sharapova men Dınara Safına da mundaı nátıjege qol jetkizbegen.
Aldaǵy jarystardaǵy óziniń de, eń jaqyn qarsylastarynyń da nátıjelerine qaramastan, Rybakına jyl sońyna deıin álemniń birinshi raketkasy mártebesin saqtap qalady. Qazirgi tańda WTA Live reıtıngisinde qazaqstandyq tennısshiniń esebinde 9 501 upaı bar. Al ekinshi orynda turǵan Arına Sobolenkonyń enshisinde 7 550 upaı. Osylaısha, Elenanyń basymdyǵy – 1 951 upaı.
Eske sala keteıik, budan buryn Tokıo týrnırinde Pýtıntsevany jeńgen Rybakınanyń shırek fınalǵa shyqqanyn jazǵan edik.
