Jyldamdyqty jıi asyratyn InDrive jáne ıAndeks Go júrgizýshileri tasymaldan shettetilýi múmkin – Kólik mınıstrligi
ASTANA. KAZINFORM – Kólik mınıstrligi jyldamdyqty jıi asyratyn InDrive jáne ıAndeks Go júrgizýshilerin jolaýshy tasymaldaýdan shettetýi múmkin. Bul týraly vedomstvonyń baspasóz qyzmeti málim etti.
Atalǵan sharalardy QR Kólik mınıstrligi men inDrive, ıAndeks Go arasynda jasalǵan yntymaqtastyq týraly Memorandým sheńberinde júzege asyrý kózdelip otyr
«Qosymshany paıdalanýshy adamnyń bergen baǵasy men jalpy reıtıngke súıene otyryp, jyldamdyqty jıi asyratyn júrgizýshiler jolaýshylardan kelip túsken tapsyrystardy oryndaýdan ýaqytsha nemese múldem shettetilýi múmkin. Sondaı-aq kólik júrgizýshilerine kóliktiń tehnıkalyq jaǵdaıyn tekserý qajettigi jóninde jáne qaýipsizdik beldikterine qatysty habarlamalar kelip turatyn bolady», — delingen habarlamada.
Jalpy QR Kólik mınıstrligi, Іshki ister mınıstrligi, ıAndeks Go jáne inDrive arasynda qol qoıylǵan Memorandým mobıldi qosymsha operatorynyń taksı tasymaldaýshylarynyń avtomobıl kóligi salasyndaǵy zańnama talaptaryn saqtaýyn qamtamasyz etý boıynsha sharalardy kezeń-kezeńimen qabyldaýyn kózdeıdi.
«Qujatty iske asyrý aıasynda platformanyń seriktes-júrgizýshilerine arnalǵan onlaın jáne oflaın formatta trenıngter ótkizý josparlanyp otyr. Oqytý barysynda jol qozǵalysy erejeleri men qalaaralyq avtomobıl joldarynda qaýipsizdik erejelerin saqtaý taqyryptary egjeı-tegjeıli qarastyrylatyn bolady. Memorandýmdy ázirleý barysynda kózdelgen basty maqsat — respýblıkalyq jáne jergilikti mańyzy bar qalaaralyq avtomobıl joldarynda, sondaı-aq qala ishindegi toraptarda jol qozǵalysyna qatysýshylardyń qaýipsizdigin arttyrý», — dep habarlady vedomstvonyń baspasóz qyzmeti.
Kompanııa ókilderiniń aıtýynsha, bıyl ekinshi toqsannyń sońyna qaraı múmkindigi shekteýli jandardyń jeke qajettilikteri men kishkentaı balalarǵa arnalǵan oryndyqtarǵa qatysty aqparatty kórsetýge múmkindik beretin qosymsha fýnktsııany engizý josparda bar.
Aıta keterligi, jyl basynda Kólik mınıstri Marat Qarabaev mobıldi taksı qyzmetine tapsyrys beretin qosymshalar operatorlarynyń ókilderimen kezdesý ótkizgen bolatyn. Otyrys barysynda avtomobıl kóligi salasyndaǵy zańnamanyń saqtalýyn qamtamasyz etý qajettiligi jáne jolaýshylardy tasymaldaý qaýipsizdigine ishki korporatıvtik talaptardy engizý máseleleri talqylanǵan edi. Otyrys qorytyndysy boıynsha jolaýshylardy tasymaldaý salasyndaǵy túıtkildi máselelerdi sheshý boıynsha naqty sharalardy engizý usynylyp, nátıjesinde bul sharalar Memorandýmda kórinis tapty. Sondaı-aq taksı agregatorynyń ókilderine júrgizýshilerdiń jumys jáne demalys tártibin saqtaý talaptaryn kúsheıtý usynylǵan bolatyn.
