Jyldamdyqty 2 km/saǵatqa asyrsań aıyppul: ІІM jańa erejege túsinikteme jasady
ASTANA. KAZINFORM — Áleýmettik jelide «jyldamdyqty tirkeý shegi tómendep, endi saǵatyna 2 shaqyrymǵa asyrýdyń ózine aıyppul salynady» degen mazmundaǵy vıdeo tarady, dep habarlaıdy Іshki ister mınıstrligi.
Vedomstvo málimetinshe, bul aqparat shyndyqqa sáıkes kelmeıdi.
— Quqyq buzýshylyq úshin jaýapkershilikke tartý tártibi ózgergen joq. Burynǵydaı ákimshilik jaýapkershilik belgilengen jyldamdyqty saǵatyna 10 shaqyrymǵa jáne odan joǵary asyrǵan jaǵdaıda ǵana qoldanylady, — deıdi ІІM ákimshilik polıtsııa komıtetiniń erekshe tapsyrmalar jónindegi aǵa ınspektory Aqtoty Boranova.
8 mamyrdan bastap kúshine enetin birlesken buıryq tek kameralardyń jumys tártibine qatysty, ıaǵnı olardyń ólsheý dáldigi men ruqsat etilgen qatelik shegin naqtylaıdy. Bul qujat júrgizýshilerge eshqandaı jańa talap engizbeıdi jáne jaýapkershilikke tartý shegine áser etpeıdi.
— Osylaısha «saǵatyna 2 shaqyrymǵa asyrý úshin aıyppul salynady» degen málimdemeler — jalǵan aqparat. Atalǵan aqparatty taratqan tulǵa anyqtaldy. Qostanaı oblysy Rýdnyı qalasynyń turǵyny sot sheshimimen ákimshilik jaýapkershilikke tartyldy. Azamattardy tek resmı aqparat kózderine súıenýge jáne tekserilmegen málimetterdi taratpaýǵa shaqyramyz, — dedi Aqtoty Boranova.
Buǵan deıin Aqtóbede jyl basynan beri jol-kólik apatynan 27 adam kóz jumǵanyn jazǵan edik.
