Jyldamdyq ólsheıtin quraldy «jedel járdem» men qoǵamdyq kólikterge tezirek ornatý kerek
ASTANA. KAZINFORM — «Aqyldy» jaıaý júrginshi ótkeli júıesi ornatylǵan jerlerde adam qaǵyp ketý derekteri múldem tirkelmegen. Bul týraly Úkimet otyrysynda Іshki ister mınıstri Erjan Sádenov aıtty.
— Bıylǵy 25 tamyzdan bastap jyldamdyq ólsheıtin quraldy «jedel járdem» men qoǵamdyq kólikterge ornatý múmkindigi týraly norma kúshine endi. Bul — joldaǵy tártipti qamtamasyz etýdiń óte tıimdi sharasy. Shetelde jıi qoldanylady. ІІM bul suraqty eki jyl boıy qozǵap keledi. Usynys retinde birneshe ret máseleni kóterdik. Qazir endi, tıisti Zań qabyldandy. Osylaısha, mindet júkteldi. Sonyń ózinde, belsendilik joq. El boıynsha qoǵamdyq kólikterde bar-joǵy 5 qural ǵana, al «jedel járdem» kólikterinde 3 keshen ǵana ornatylǵan. Ákimdikter bul júıeni tezirek engizý qajet, — dedi Erjan Sádenov.
Mınıstrdiń aıtýynsha, jaıaý adamdy ótkizbegen kólikterdi anyqtaıtyn «Aqyldy» jaıaý júrginshi ótkeli júıesi óz tıimdiligin kórsetti. Olar ornatylǵan jerlerde adam qaǵyp ketý derekteri múldem tirkelmegen.
— Qazirgi ýaqytta mundaı 126 qural jumys istep tur. Biraq, bul — óte az. Al, 12 óńirde mundaı júıe múldem ornatylmaǵan. Biz aýyldardy aıtpaımyz. Qalanyń ózinde jaǵdaı máz emes. Bul másele birneshe ret aldyńǵy otyrystarda kóterildi, ákimder ony biledi. Sondyqtan, bul máseleni tezirek sheshý kerek, — dedi ol.
Aıta keteıik, otyrysta jol qozǵalysy qaýipsizdigin qamtamasyz etý máselesi qaralyp, jylý berý maýsymyna daıyndyq barysy pysyqtalyp jatyr.
