Jyldam aqsha: Oralda joǵary paıyzben shaǵyn nesıe bergenderge tergeý bastaldy

ASTANA. KAZINFORM – Qarjylyq monıtorıng agenttiginiń Batys Qazaqstan oblysy boıynsha departamenti prokýratýranyń úılestirýimen Oral qalasynda lıtsenzııasyz shaǵyn nesıe berý qyzmetin kórsetken tulǵalar tobyna qatysty tergeý júrgizip jatyr.

Bes jyl boıy kúdiktiler «Jyldam aqsha» degen ataýmen keńinen taralǵan fılıaldar jelisi arqyly azamattarmen jalpy somasy 1,5 mlrd teńgeden asatyn shaǵyn nesıe kelisimsharttaryn jasaǵan.

- Nesıeniń paıyzdary bólek shart arqyly «keńes berý qyzmeti» retinde kórsetilip, bul qyzmetter kúdiktiniń týysyna tirkelgen, olarmen baılanysy bar JShS arqyly rásimdelgen.

Qaryz alýshylar kúnsaıyn 1,5% tóleýge májbúr bolyp, bul zańmen belgilengen shekti mólsherlemeden 0,3% ıaǵnı bes esege artyq bolǵan. Atalǵan zańsyz shaǵyn nesıe uıymy arqyly 47 myńnan astam qaryz joǵary paıyzben berilgen, - dep jazdy departamentten.

Aldyn ala málimet boıynsha, zańsyz alynǵan tabys kólemi 917 mln teńgeni quraıdy. Sottyń sanktsııasymen kúdiktilerdiń óndiristik kommertsııalyq nysany men bir páterine tyıym salyndy.

Tergeý jalǵasýda.

Aıta keteıik, BQO-da alaıaqtarǵa járdemdesken eki turǵynnan 1,5 mln astam teńge óndirildi.