Jylandar jer silkinisin 7 kún buryn seze almaıdy – Ǵanı Nazarbek
TÚRKІSTAN. KAZINFORM – Búgin áleýmettik jelide qar ústinde jorǵalaǵan jylannyń vıdeosy tarady. Avtor oqıǵanyń Qazyǵurt aýdanynda bolǵanyn jazǵan.
«26 qańtar. Jylannyń júrisin qara», - deıdi vıdeony jelige júktegen azamat.
Jazbanyń astyna pikir jazǵandar qysqy mezgilde qalyń uıqyǵa ketetin jorǵalaýshynyń bul áreketine ár túrli baǵa berip jatyr. Biri «Jer silkinisin 7 kún buryn bilgen jylandar, jer betine shyǵyp ketti» dese, endibiri «Jerdiń asty tynysh bolmaı tur» deıdi. Sondaı-aq jeli qoldanýshylary «Jyly ornynan jaıdan-jaı shyqpasa kerek», «Jylan jer silkinisin aldyn ala sezedi deıtin. Qar betine shyǵyp ketkeni sony meńzeıdi. Tynyshtyq bolsyn!», «Shóptiń ishinde jatqan jylan ǵoı. Malǵa azyq shashqanda arasynan shyqqan sııaqty», «Kún jylynýynyń shyraıy» degen saryndaǵy pikirler de jazǵan.
Atalǵan jaǵdaıǵa baılanysty «Syrdarııa – Túrkistan» memlekettik óńirlik tabıǵı parkiniń ǵylymı qyzmetkeri Ǵanı Nazarbekten tabıǵı qubylystyń jaı-japsaryn suradyq.
«Bul jerde jylan júrgen aımaqty zerttep kórý kerek. Sebebi, sol mańda qurylys jumystary júrip jatqan bolýy da múmkin. Gaz qubyryn, sý qubyryn tartýǵa jer qazylsa, uıqyda jatqan jylandar oıanyp ketedi. Sondaı-aq qazir úıinde jylan asyraıtyndar kóp. Olar da «haıp» úshin jylandy qar ústine tastap vıdeo túsirip jatady. Jalpy jylandar jer astynda bolǵan soń, jer silkinisi sekildi tabıǵı qubylystardy sezedi. Biraq bir jeti emes, 10-15 mınýt buryn, ary ketkende 1 saǵat buryn ǵana seze alady. Jer silkinisin sezgen jaǵdaıda bir-ekeýi ǵana emes, syrtqa jappaı shyǵyp ketýi kerek. Tek jylandar ǵana emes, tasbaqa, saryshunaq sekildi jer astynda ómir súretin barlyq janýar men jándik jer ústine shyǵady», - dep jaýap berdi Ǵanı Nazarbek.
