«Jyl volonteri — 2026» baıqaýynyń ekinshi kezeńine ótkenderdiń tizimi jarııalandy
ASTANA. KAZINFORM — «Jyl volonteri — 2026» halyqaralyq syılyǵynyń ekinshi kezeńine 127 úmitker ótti, dep habarlaıdy Mádenıet jáne aqparat mınıstrliginiń baspasóz qyzmeti.
10-19 qazan aralyǵynda Qazvolunteer.kz biryńǵaı onlaın platformasynda ótken «Jyl volonteri — 2026» halyqaralyq syılyǵyna daýys berý aıaqtaldy.
— Daýys berý nátıjesinde 127 úmitker baıqaýdyń ekinshi kezeńine joldama aldy. Kelesi kezeńde baıqaý komıssııasy úmitkerlerdiń ótinimderin qarap, 15 atalym boıynsha jeńimpazdardy anyqtaıdy, — delingen habarlamada.
Halyqaralyq syılyq 2020 jyly Memleket basshysynyń bastamasymen taǵaıyndalǵan. Ol qoǵamdaǵy mańyzdy máselelerdi sheshýge eleýli úles qosqan volonterlerdiń, volonterlik toptar men uıymdardyń, sonyń ishinde halyqaralyq uıymdardyń eńbegin baǵalaýdy kózdeıdi.
Alty jyl ishinde Ázerbaıjan, Qazaqstan, Qyrǵyzstan, Ózbekstan jáne Reseıden 297 volonter atalǵan syılyqtyń laýreaty atandy.
Syılyq volonterlik qozǵalysty keńinen nasıhattaýǵa, qoǵamǵa paıdaly bastamalardy qoldaýǵa jáne volonterlik mádenıetti damytýǵa baǵyttalǵan. Sonymen qatar halyqtyń áleýmettik osal toptaryna kómek kórsetip, ózekti qoǵamdyq máselelerdi sheshýge atsalysyp júrgen volonterlerdiń eńbegin kópshilikke tanytýdy maqsat etedi.
Aıta keteıik, ekinshi kezeńge ótken volonterlerdiń tizimi kórý úshin siltemege ótý qajet.
Budan buryn astanalyq oqýshy Earth Ambassadors halyqaralyq jastar qozǵalysynyń prezıdenti atanǵanyn jazdyq.
