Jyl sońyna deıin shetelden taǵy 180 mlrd teńge qaıtarylady

Byltyrdan bastap zańsyz shyǵarylǵan 857 mlrd teńge elimizge qaıtaryldy. Bul týraly QR Sybaılas jemqorlyqqa qarsy is-qımyl agenttiginiń sotqa deıingi tergep-tekserý qyzmetiniń basshysy Qanat Cúleımenov aıtty, dep habarlaıdy Kazinform.

«Sybaılas jemqorlyqqa qarsy qyzmet byltyrdan bastap qazirge deıin 857 mlrd teńge qaıtardy. Bul somada shetelden qaıtarylǵan qarajat pen jyljymaıtyn múlik te qamtylyp otyr. Máselen, ÓKM Operatory isi boıynsha úkim shyqqan bolatyn jáne onyń aıasynda 180 mlrd teńge qaıtaryldy. Bul qarajattyń bir bóligi jeńildikpen avtonesıe berýge baǵyttalǵan edi. Jalpy, qaıtarylǵan qarjy elimizdegi áleýmettik saladaǵy máselelerdi sheshýge jumsalady», - dedi Qanat Súleımenov Amanat partııasynda ótken baspasóz máslıhatynda.

Sonymen qatar ol jyl sońyna deıin qansha aktıv qaıtarylýy múmkin ekenin aıtty.

«Bıylǵy jyldyń aıaǵyna deıin taǵy 180 mlrd teńge qaıtarý josparlanǵan. Bul qarajat somasyna sheteldegi aqsha men jyljymaıtyn múlik, qymbat kólikter kirip otyr. Qazir bul ister tergelip jatyr», - dedi agenttik ókili.

Budan buryn Qarjylyq monıtorıng agenttiginiń tóraǵasy Janat Elımanov jyl basynan beri memleketke jalpy somasy 217 mlrd teńge bolatyn aktıvter qaıtarylǵanyn aıtqan edi.