Jyl sońyna deıin volonterliktiń damý baǵytyn aıqyndaıtyn tujyrymdama ázirlenedi
ASTANA. KAZINFORM – Osy jyldyń sońyna deıin elimizdegi volonterliktiń damý baǵytyn aıqyndaıtyn tujyrymdama ázirlenedi. Bul týraly Mádenıet jáne aqparat mınıstrliginen málim etti.
- Qazirgi ýaqytta 2030 jylǵa deıingi volonterlik qozǵalysty damytý tujyrymdamasynyń jobasyn qalyptastyrý maqsatynda usynystar, usynymdar men pikirler jınaýǵa arnalǵan óńirlik fokýs toptar óz jumysyn bastady. Qujattyń sapaly ári mazmundy bolýyn qamtamasyz etý maqsatynda óńirlik erekshelikter eskerile otyryp, keshendi taldaý jumystary júrgizilýde, - dedi mınıstrlikten agenttiktiń resmı saýalyna oraı.
Vedomstvo málimetine qaraǵanda, volonterlerdiń Ulttyq front ofısiniń sarapshylary el óńirlerine monıtorıngtik saparlar uıymdastyryp jatyr. Onyń aıasynda úkimettik emes uıymdardyń ókilderimen jáne volonterlik uıymdardyń jetekshilerimen kezdesýler ótkizilip, jergilikti jerlerdegi volonterlik qyzmettiń ózekti máseleleri boıynsha jan-jaqty taldaý jınalady.
- Qazirgi tańda 5 óńir boıynsha (Qaraǵandy, Qostanaı, Jambyl oblystary, sondaı-aq Shymkent jáne Almaty qalalary) jumys tolyq aıaqtaldy. Bıyl qyrkúıekke deıin qalǵan óńirlerdi qamtý jáne jınalǵan derekterdi júıelep, jyldyń sońyna deıin eldegi volonterliktiń damý baǵytyn aıqyndaıtyn tujyrymdamany ázirleý josparlanǵan, - dep atap ótedi Mádenıet mınıstrligi.
Buǵan deıin Volonterdiń tsıfrlyq pasporty jyl sońyna deıin engiziletinin jazǵan edik.
