Tranzıttik jáne eksporttyq konteınerlik tasymal kólemi 1,7 mln JFE-ge jetedi — QTJ

ASTANA. KAZINFORM — Bıyl elimiz arqyly 27,9 mln tonna tranzıttik júk tasymaldandy. Bul týraly Úkimet otyrysynda «QTJ» UK» AQ basqarma tóraǵasy Talǵat Aldybergenov aıtty.

— Eksplýatatsııalyq júk aınalymy jyl saıyn turaqty ósip otyr. 11 aıda bul kórsetkish shaqyrymyna 264 mlrd boldy. Bul ótken jyldyń sáıkes kezeńimen salystyrǵanda 7,4 paıyz kóp. Іri kásiporyndardyń eksportyn tasymaldaý dınamıkasy oń — 6,5 paıyz ósim bar, ıaǵnı 80 mln tonna boldy. Dostyq–Moıynty jolynyń ashylýy serpin berip, Qytaıǵa baǵyttalatyn otandyq eksport 11 paıyz ósti, — dedi ol.

Onyń aıtýynsha, tranzıt tasymaly da jyl saıyn artyp otyr.

— Bıyl 27,9 mln tonna boldy. Ótken jylmen salystyrǵanda bul 12 paıyz kóp. Al vagondarmen esepteıtin bolsaq, 84 myńǵa artyq. Ósim — 15 paıyz. Mundaı kórsetkishke temirjol ınfraqurylymyn damytýdaǵy memleket qoldaýynyń arqasynda jetip otyrmyz. Jyl sońyna deıin halyqaralyq temirjol dálizderi boıynsha tranzıttik jáne eksporttyq konteınerlik tasymal kólemi 1,7 mln JFE (jıyrma fýnttyq ekvıvalent — red.) bolady. Al kompanııanyń osy jylǵa arnalǵan josparynda tek konteınerlik tranzıt kólemin 1,5 mln JFE-ge jetkizý mindeti tur, — dedi kompanııa basshysy.

Talǵat Aldybergenov Transkaspıı halyqaralyq kólik marshrýtyn damytýǵa erekshe kóńil bólingenin aıtty.

— Kaspııdegi ınfraqurylym keńeıip keledi. Sondaı-aq ázerbaıjandyq jáne grýzııalyq áriptestermen birlesip, osy marshrýt boıynsha ınfraqurylym tekserildi jáne qazirgi tańda ortaq Jol kartasy júzege asyrylyp jatyr. 11 aıda TMTM baǵyty boıynsha konteınerlik tranzıt 38,2 myń DFE bolyp, ótken jylǵy deńgeıden 21 paıyz joǵary boldy. Sondaı-aq 18-shi qarasha kúni Sıan qalasynda Qytaı temir joldary TMTM quramyna qosyldy. Bul, sózsiz, TMTM boıynsha tasymaldar kóleminiń jáne onyń halyqaralyq arenadaǵy mártebesin arttyrady, — dedi ol.

Aıta keteıik, Úkimet otyrysynda elimizdiń kólik-tranzıt salasyn damytý men tsıfrlandyrý máselesi talqylandy.