Jyl sońyna deıin taǵy 30 myńnan astam pedagog kýrstan ótedi

ASTANA. KAZINFORM – QR Oqý-aǵartý mınıstrligi mektepke deıingi, orta, arnaıy bilim berý pedagogterine olardyń beıindik qyzmetterine qaraı pándik jáne tsıfrlyq quzyretterdi damytý, sondaı-aq ınklıýzııalyq bilim berý boıynsha kýrstardy turaqty túrde ótkizip keledi.

Byltyr «Órleý» biliktilikti arttyrý ulttyq ortalyǵynda 80 myńnan astam pedagog tegin kýrstardan ótti. Onyń ishinde 57,8 paıyzy – aýyl mektepteriniń muǵalimi. Al osy jyldyń basynan beri mundaı kýrstarǵa 39 myńnan astam pedagog qatysty.

Mınıstrlik málimetinshe, 2025 jyldyń qyrkúıegi men jeltoqsan aıynyń aralyǵynda Qazaqstanda taǵy 30 myńnan astam pedagog biliktilikti arttyrý kýrstarynan ótedi. Baǵdarlamalar bastaýysh synyptan bastap, qoǵamdyq-gýmanıtarlyq jáne jaratylystaný-matematıkalyq baǵyttaǵy pán muǵalimderin qamtıdy. Sondaı-aq tyńdaýshylardyń bir bóligi ınklıýzıvti bilim berý, kóshbasshylyq, ınnovatsııalar men tsıfrlyq quzyrettilikke qatysty kýrstar alady.

Olardyń ishinde 80 saǵattyq 43 kýrs oflaın formatta ótse, 2 kýrs onlaın formatta uıymdastyrylǵan. Ásirese «Inklıýzıvti bilim berýdi iske asyratyn pedagogterdiń bazalyq quzyretterin qalyptastyrý», «Qarjylyq saýattylyq negizderi», «Oqý úderisi jáne JI: generatıvti modelder men promt-ınjınırıng óneri» jáne Keleshek mektepteriniń pedagogterine arnalǵan kýrstarǵa basymdyq berilip otyr.

Aıta keteıik, Qazaqstanda muǵalim mártebesin arttyrýǵa jáne olardyń kásibı áleýetin tolyq ashýǵa baǵyttalǵan júıeli qadamdar jasalyp jatyr. Bul týraly Oqý-aǵartý mınıstrliginiń Bilim salasynda sapany qamtamasyz etý komıtetiniń tóraǵasy Serik Áshirov aıtty.

Onyń sózinshe, búgingi kúni elimizdegi 22 myńnan astam bilim berý uıymdarynda eńbek etip júrgen 600 myńǵa jýyq pedagogtiń qoǵamdaǵy orny aıryqsha aıqyndalyp, memleket tarapynan turaqty túrde qoldaý kórsetilip keledi.