Jyl sońyna deıin taǵy 2 myń shaqyrymnan astam jol aqyly bolady

ASTANA. KAZINFORM — Respýblıkalyq joldardy kútip ustaýǵa ǵana jyl saıyn 80 mlrd teńge kerek. Kólik mınıstri Marat Qarabaev Úkimet otyrysynda osyndaı derek keltirdi.

«Respýblıkalyq mańyzy bar 25 myń shaqyrym joldardy kútip ustaýǵa 80 mlrd teńge qajet. Sondyqtan, bıýdjetke artyq salmaq túsirmeý úshin aqyly joldardy engizý jumystary jalǵasady. Búgingi tańda aqyly joldardyń jalpy uzyndyǵy — 3 myń 200 shaqyrym. Ótken jyldyń qorytyndysy boıynsha bul joldardan 30 mlrd teńge jınaldy», — dedi ol.

Mınıstr atalǵan qarajat joldy kútip ustaýǵa, aǵymdaǵy jóndeýge jáne tehnıka satyp alýǵa jumsalǵanyn atap ótti.

«Rekonstrýktsııadan ótken joldardy normatıvtik deńgeıde kútip ustaý úshin bıyl jalpy uzyndyǵy 2 myń shaqyrymnan asatyn 11 ýchaskege kezeń-kezeńimen aqy alýdy engizý josparlanyp otyr», — dedi Marat Qarabaev.

Mınıstrlik málimetinshe, jolaýshylardan aqy alynatyn jańa joldardyń tizimi mynandaı:

Qyzylorda-Aral;

Aqtóbe-Orynbor;

Qostanaı-Troıtsk;

Qostanaı-Denısovka;

Aqtaý-Beıneý;

Qandyaǵash-Maqat;

Balqash-Býrylbaıtal;

Býrylbaıtal-Shý;

Úsharal-Dostyq; 

Qaraǵandy qalasynyń aınalma joly;

Taraz qalasynyń aınalma joly.