Jyl sońyna deıin Soltústik Aral teńizine qosymsha 1,2 mlrd tekshe metr sý jiberiledi
ASTANA. KAZINFORM – Jyl sońyna deıin Soltústik Aral teńizine qosymsha 1,2 mlrd tekshe metr sý jiberý josparlanyp otyr. Bul týraly Sý resýrstary jáne ırrıgatsııa mınıstri Nurjan Nurjigitov Qyzylorda oblysyna jumys sapary barysynda Aral aýdanyndaǵy balyqshylarmen kezdesýde aıtty, dep habarlaıdy Sý resýrstary jáne ırrıgatsııa mınıstrligi.
Mınıstrdiń aıtýynsha, Soltústik Aral teńizin saqtaý baǵytynda keshendi jumystar júrgizilip jatyr. Osy maqsatta Dúnıejúzilik bankpen birlesken jobanyń ekinshi kezeńi ázirlengen.
– Kókaral bógetin rekonstrýktsııalaý arqyly teńizdegi sý deńgeıin kóterip, sý kólemin arttyrý josparlanyp otyr. Sý resýrstaryn basqarý júıesin damytýdyń 2030 jylǵa deıingi tujyrymdamasyna sáıkes Soltústik Araldaǵy sý kólemin 34 mlrd tekshe metrge deıin jetkizý jónindegi is-sharalar iske asyrylýda, – dedi Nurjan Nurjigitov.
Mınıstrlik málimetinshe, 2025 jylǵy 1 qazannan beri Syrdarııa ózeni arqyly Soltústik Aral teńizine 1,4 mlrd tekshe metr sý jiberilgen. Al bıylǵy vegetatsııalyq kezeńde teńizge sekýndyna 40 tekshe metr sý aǵyzylyp jatyr.
Qazirgi ýaqytta Soltústik Araldaǵy sý kólemi 23,5 mlrd tekshe metrdi quraıdy. Ótken jylmen salystyrǵanda teńiz sýynyń tuzdylyǵy orta eseppen 10%-ǵa tómendep, 7,9 promıllege jetken. Sondaı-aq 2026 jyldyń alǵashqy jartyjyldyǵynda teńizden 4,2 myń tonna balyq aýlanǵan.
Kezdesý barysynda balyqshylar sý paıdalaný lımıtteriniń qatań saqtalýyn qamtamasyz etý qajettigin kóterdi.
– Biz Syrdarııanyń tómengi aǵysynda ornalasqandyqtan, óńirdegi balyq sharýashylyǵynyń turaqtylyǵy úshin dıqandardyń sýdy únemdep paıdalanýy asa mańyzdy. Únemdelgen sý óńirdegi sý aıdyndaryn saqtap qalýǵa qajet, – dedi «Aral» servıstik-daıyndaý ortalyǵy» JShS dırektory Ádilbek Aıymbetov.
Sonymen qatar balyqshylar Syrdarııa arqyly sýdy tıimdi ótkizý úshin Amanótkel sý torabynda shlıýz salýdy usyndy. Bul sý ótkizý kólemin sekýndyna 100 tekshe metrge deıin arttyrýǵa múmkindik beredi.
Kezdesý qorytyndysy boıynsha mınıstr Sý sharýashylyǵy komıtetine atalǵan shlıýzdiń jobalaý-smetalyq qujatyn ázirleýdi tapsyrdy. Sondaı-aq Aral-Syrdarııa basseındik ınspektsııasyna sý únemdeý tehnologııalary esebinen únemdelgen sýdy qosa alǵanda, Soltústik Aral teńizine turaqty sý jiberýdi qamtamasyz etý jóninde tapsyrma berdi.
Jumys sapary aıasynda Nurjan Nurjigitov Aqlaq sý torabynda bolyp, teńizdi sýmen tolyqtyrý jumystarynyń barysymen tanysty. Sekýndyna 515 tekshe metrge deıin sý ótkizýge qaýqarly bul nysan Syrdarııa saǵasyndaǵy birneshe kól men iri jaıylma alqaptardy sýmen qamtamasyz etedi.
Aıta keteıik, Atyraýda kólshikterde qutqarylǵan shabaq sany 12 mıllıonnan asty.
