Jyl sońyna deıin Salyq kodeksine ózgerister engizilýi múmkin — Serik Jumanǵarın

ASTANA. KAZINFORM — Premer-mınıstrdiń orynbasary — Ulttyq ekonomıka mınıstri Serik Jumanǵarın Salyq kodeksine ózgerister engizý múmkindigine qatysty pikir bildirdi.

— Iá, qarastyryp jatyrmyz. Sheshim qabyldaýdyń naqty bir ádisi bar, ıaǵnı keıbir másele boıynsha jaýap berý merzimderin 3, 5, 10 kún dep belgiledik. Eger osy ýaqyt ishinde jaýap bere almasaq, onda bul másele júıeli sıpatqa ıe degen sóz. Mundaı suraqtar Salyq kodeksine ózgerister engizý jónindegi jumys tobynda talqylanatyn saýaldar sebetine jiberiledi. Bul — jyl saıyn otyrys ótkizetin standartty jumys toby. Ózgeristerdi, bálkim, osy jyldyń sońynda kóretin shyǵarmyz. Olar kelesi jyly kúshine enýi yqtımal, — dedi mınıstr Májilistiń jalpy otyrysynan keıin.

Ol túzetýler engizý qajettigi jóninde birqatar sheshim qabyldanǵanyn atap ótti.

— Jasyryp qajeti joq, engizilýi tıis dep sheshim qabyldaǵan másele óte kóp. Keıbir tustarda Bıýdjet pen Salyq kodeksteri arasynda sáıkessizdikter bolǵan. Jalpy jaǵdaı jumys tártibinde. Jobalyq keńse qalypty rejımde otyrystar ótkizip jatyr, — dedi Serik Jumanǵarın.

Buǵan deıin Premer-mınıstrdiń orynbasary — Ulttyq ekonomıka mınıstri Serik Jumanǵarınniń tóraǵalyǵymen ótken Jobalyq keńseniń altynshy otyrysynda jańa Salyq kodeksiniń normalaryn ımplementatsııalaý máselesiniń kezekti toby talqylanǵan edi.