Jyl sońyna deıin pılotsyz kólik quraldaryn paıdalanýdyń zań aktisi qabyldanady

ASTANA. KAZINFORM — Búginde elimizde pılotsyz kólik quraldaryn paıdalaný boıynsha quqyqtyq sheńber áli kúnge deıin naqty aıqyndalmaǵan. Bul týraly Kólik vıtse-mınıstri Maqsat Qalıaqparov aıtty. 

— Pılotsyz kólik quraldary ǵylym men tehnıkany (jasandy ıntellekt, robototehnıka, baılanys jáne t. b.) damytý mınıstrlik alǵa qoıǵan basym baǵyttardyń biri. Alaıda pılotsyz kólik quraldaryn paıdalaný boıynsha quqyqtyq sheńber áli kúnge deıin naqty aıqyndalmaǵan. Pılotsyz quraldardyń qyzmetin odan ári nysanaly retteýdiń negizin qalyptastyrý maqsatynda mınıstrlik qoldanystaǵy zańnamalyq aktige túzetýler engizdi, — dedi Maqsat Qalıaqparov Úkimet otyrysynda.

Mınıstrdiń málimdeýinshe, jańalanǵan zańnamalyq aktide negizgi uǵymdar men ýákiletti organdardyń quzyreti kózdelgen.

— Túzetýler aldyn ala barlyq memlekettik organmen kelisildi. Jyl sońyna deıin qabyldaıtyn bolamyz. Bul rette, pılotsyz kólikterdi qoldaný tıisti ınfraqurylymnyń bolýyn talap etedi. Osyǵan baılanysty pılotsyz kólikter arqyly júk tasymalyn uıymdastyrý úshin «smart» joldardy salý múmkindigi qarastyrylyp jatyr. Qazir pılotsyz júk tasymasyn Qazaqstan — Qytaı shekarasynda (Bahty — Pokıtý) qoldaný boıynsha jumys qolǵa alyndy, — dep tolyqtyrdy ol.

Eske sala ketsek, bıyl jazda elimizde azamattyq pılotsyz avıatsııany damytýdyń tujyrymdamasy bekitildi.