Jyl sońyna deıin Pavlodardyń aýyldyq aımaqtarynda 30 emdeý mekemesi ashylady
PAVLODAR. KAZINFORM - Ertis-Baıan óńiriniń aýyldarynda jańadan 30 emdeý uıymy paıda bolady. Bul «Aýyldyq densaýlyq saqtaý salasyn jańǵyrtý» jalpyulttyq jobasy aıasynda múmkin bolyp otyr.
Maı aýdanynyń Aqjar aýylynda osyndaı alǵashqy medıtsınalyq pýnkt ashyldy. Bul – «Aýyldyq densaýlyq saqtaý salasyn jańǵyrtý» jalpyulttyq jobasy jáne QR Prezıdenti Qasym-Jomart Toqaevtyń saılaýaldy baǵdarlamasyn júzege asyrý aıasynda boı kótergen jańa medıtsınalyq uıym.
- Feldsherlik pýnktke 500-den astam adam qarala alady. Jańa qural-jabdyqtardyń arqasynda medıtsınalyq qyzmet kórsetý aıasy keńeıdi. Mekemege EKG jazýǵa arnalǵan telekardıograf, defıbrıllıator, tynys alý joldarynyń aspıratsııasyna arnalǵan elektr sorǵysh qurylǵy jáne kóktamyrishilik ınfýzııaǵa arnalǵan shprıtsti ınfýzııalyq sorǵylar satyp alyndy. Buǵan qosa fızıoemdeýde qoldanylatyn nebýlaızer, joǵarǵy tynys joldaryn, qulaq qýysyn emdeýge arnalǵan ýltrakúlgin sáýlelendirgish, BTL magnıttik terapııa apparaty da jańartyldy. Munda protsedýra, fızıoterapııa, patsıentterdi qabyldaýǵa jáne dárihanaǵa arnalǵan tórt kabınet, kúndizgi statsıonar bar, - dep habarlady óńirlik Densaýlyq saqtaý basqarmasynan.
Aqjardaǵy eski medıtsınalyq pýnkt 1985 jyly salynǵan. Ǵımaraty ábden eskirip ketkeni sebepti emdeý uıymyn jańadan turǵyzýǵa sheshim qabyldanǵan. Qurylysyna 137 mln teńge jumsalǵan.
Aıtyp óteıik, jyl sońyna deıin Pavlodar oblysynyń aýyldyq aýmaqtarynda 15 myńnan astam turǵyndy sapaly medıtsınalyq kómekpen qamtamasyz etetin 30 emdeý mekemesi ashylady.
Buǵan deıin Pavlodarda respýblıkalyq tas joldardyń boıynda shuǵyl medıtsınalyq beketter ashylatyny týraly jazǵanbyz.