Jyl sońyna deıin Ózbekstan Qazaqstanannan 35 myń tonna munaı qabyldaıdy

TAShKENT. KAZINFORM — Jeltoqsan aıynyń sońyna deıin Ferǵana munaı óńdeý zaýyty Qazaqstannan 35 myń tonna munaı qabyldaýdy josparlap otyr, dep habarlaıdy Kazinform agenttiginiń menshikti tilshisi.

Kásiporynnyń baspasóz qyzmetinen málim etkendeı, zaýyt jańartylǵan tranzıt aıasynda Qazaqstannan munaı qabyldaýdy bastady. Tıisinshe, jyl sońyna deıin ózbek tarapyna 35 myń tonna shıkizat jetkizilmek.

— Óńdelgen munaı tolyq Ózbekstannyń ishki naryǵyna baǵyttalady. Qol jetkizilgen ýaǵdalastyq sheńberinde qolaıly naryqtyq jaǵdaı saqtasa, onda jetkizilim jylyna 500 myń tonnaǵa deıin jetýi múmkin, — delingen munaı óńdeý zaýyty taratqan habarlamada.

Shıkizat kólemin arttyrý ishki suranystaǵy benzın, dızel, kerosın jáne maılar óndirisin arttyrýǵa múmkindik beredi.

Eske salaıyq, taıaýda ımporttyń tómendeýinen Ózbekstandaǵy gaz quıý stantsııalarynyń jumysyna shekteý engizilgen edi. Energetıka mınıstri Jýrabek Mırzamahmýdov atap ótkendeı, kórshiles eldiń kógildir otyn tasymaldaý júıesinde bolǵan aqaýdan respýblıkada 6 mln tekshe metr gaz tapshylyǵy bolǵan.

Buǵan deıin habarlaǵanymyzdaı, Qazaqstan 11 aıda 73,4 mln tonna munaı eksporttady.