Jyl sońyna deıin oqýshylar tolyqtaı dárigerler tekserýinen ótedi

ASTANA. KAZINFORM – Densaýlyq saqtaý mınıstri Aqmaral Álnazarova mektep oqýshylarynyń densaýlyǵyna qatysty túsinik berdi.

- Elimizdegi balalardyń 65 paıyzdan astamy mektepterde oqıdy. Shaǵyn jınaqtalǵan (50 balaǵa deıingi) mektepterdi qospaǵanda, barlyq mektepte medıtsınalyq pýnktter bar. Árbir mekteptegi medıtsınalyq pýnkttiń jumysyn osy aýmaqqa qyzmet kórsetetin medıtsınalyq sanıtarııalyq-alǵashqy kómek (MSAK) uıymdary úılestirip otyr. Sońǵy jyldary mektepterdegi medıtsınalyq pýnktterdiń jabdyqtalýy 15,3 %-ǵa (2023 j. – 72%; 2025 j. - 83%), mektep meıirgerlerimen qamtamasyz etý 9,2%-ǵa (2023 j. – 87%; 2025 j. - 95%) ósti. Dúnıejúzilik densaýdyq saqtaý uıymynyń qoldaýymen elimizde densaýlyqty nyǵaıtýǵa yqpal etetin mektepter jobasy júzege asyrylyp otyr. Keıingi jyldary olardyń sany 3,7 %-ǵa artty (2024 j. - 2 533, 2025 - 2 627), - dedi A. Álnazarova Úkimet otyrysynda.

Sonymen qatar ol jyl saıyn mektep oqýshylaryn profılaktıkalyq tekserýdi MSAK uıymdarynyń mamandary bilim berý uıymdarynda ótkizetinin eske saldy.

- 2025 jyldyń birinshi jarty jyldyǵynyń qorytyndysy boıynsha jyldyq jospardaǵy balalardyń 52 paıyzy tekserildi, qalǵan oqýshylar jyl sońyna deıin tekseriledi. Tekserý qorytyndylary boıynsha balalardyń 11 paıyzynda aýrýlar (onyń ishinde karıes, temir tapshylyǵy anemııasy, mıopııa) alǵash ret anyqtaldy. Olardyń 30%-y dınamıkalyq baqylaýǵa alyndy. Bıyl ǵylymı-tehnıkalyq baǵdarlama aıasynda úzdik halyqaralyq tájirıbelerdi eskere otyryp, aýrýlardyń aldyn alýǵa, kómek kórsetýge jáne ońaltýǵa baǵyttalǵan mektep oqýshylarynyń densaýlyǵyn nyǵaıtý boıynsha zertteý júrgizilýde, - dedi mınıstr.

Budan buryn habarlanǵandaı, jyl sońyna deıin «Qazaqstan balalary» biryńǵaı baǵdarlamasy qabyldanady.