Jyl sońyna deıin kóshi-qon protsesin retteıtin tsıfrlyq platforma engiziledi — Úkimet

ASTANA. KAZINFORM — Úkimet basshysy Oljas Bektenov quzyrly organdarǵa kóshi-qon salasynda biryńǵaı tsıfrlyq platforma engizýdi júktedi. 

— Kóshi-qon salasynda zań buzý faktileri bar. Máselen, bıyl mamyrda jedel profılaktıkalyq is-shara barysynda kóshi-qon zańnamasyn buzýdyń 7 myńnan astam faktisi anyqtaldy. Mundaı jaǵdaıdyń jolyn ýaqtyly kesý kerek. Ol úshin tsıfrlyq quraldardy belsendi túrde engizý qajet. Mıgranttardyń qozǵalysyn júıege keltirip, tolyqqandy monıtorıng júrgizý úshin shekaradan ótken kezde beriletin kóship-qonýshynyń id-kartasyn engizý jumysyn jedeldetken jón, — dedi Oljas Bektenov Úkimet otyrysynda.

Sondaı-aq Premer-mınıstr Eńbek jáne halyqty áleýmettik qorǵaý mınıstri men Tsıfrlyq damý, ınnovatsııalar jáne aeroǵarysh ónerkásibi mınıstrine tapsyrma berdi.

— Bıyl 1 qarashaǵa deıin barlyq derekqordy tolyǵymen ıntegratsııalaı otyryp, kóshi-qon protsesin esepke alýdyń biryńǵaı tsıfrlyq platformasyn engizýdi qamtamasyz etýge tıis, — dep tolyqtyrdy ol.

Eske salsaq, jyl basynda elimizde demografııa jáne kóshi-qon salasyn retteıtin memlekettik organ qurý usynylǵan edi. 

Aıta ketsek, bıyl 1 mln-ǵa jýyq shetel azamaty Qazaqstanǵa kelýge ótinish bergen.