Jyl sońyna deıin «Qazaqstan balalary» biryńǵaı baǵdarlamasy qabyldanady
ASTANA. KAZINFORM – «Zań jáne tártip» pılottyq jobasy qyrkúıek aıynan bastap Almaty oblysynda iske asyrylady. Bul týraly Oqý-aǵartý mınıstri Ǵanı Beısembaev málim etti.
- Qosymsha bilim berýge toqtalsam, tamyz aıynan bastap qarjylandyrýdyń ashyqtyǵy men tıimdiligin qamtamasyz etýge baǵyttalǵan qosymsha bilimge biryńǵaı memlekettik tapsyrysty engizý boıynsha pılottyq joba iske qosylady.
Pılot Astana, Aqtóbe, Atyraý, Qaraǵandy, Qyzylorda jáne Shymkent qalalarynda vaýcherlik qarjylandyrý formatynda iske asyrylady. Qazirgi ýaqytta tórt mınıstrliktiń birlesken buıryǵy qabyldanyp, pılotqa qosylǵan óńirlerde daıyndyq jumystary júrgizildi. Osy tetikti 2026 jyldan bastap barlyq óńirlerde masshtabtaý josparlanǵan, - dedi Ǵ. Beısembaev Úkimet otyrysynda.
Onyń aıtýynsha, Memleket basshysy usynǵan «Zań jáne tártip» qaǵıdatyn óskeleń urpaqtyń boıyna sińirý maqsatynda oqýshylar arasynda «Zań jáne tártip» pılottyq jobasy qyrkúıek aıynan bastap Almaty oblysynda iske asyryla bastaıdy.
- Bıyl qamqorshylyq organdary mamandarynyń normatıvi 5 myń balaǵa 1 maman esebimen zańmen belgilendi. Qazir mamandar sany 303-ten 896-ǵa deıin ósti. Jyl sońyna deıin barlyq óńirler normatıvtiń oryndalýyn qamtamasyz etýi tıis.
Byltyr testileý kezeńinde tıimdiligin dáleldegen Kiva jáne «DosbolLIKE» býllıngke qarsy baǵdarlamalary qyrkúıekten bastap barlyq mektepterde engiziledi. Prezıdenttiń tapsyrmasyna sáıkes, jyl sońyna deıin «Qazaqstan balalary» biryńǵaı baǵdarlamasy qabyldanady. Qazirgi ýaqytta baǵdarlamanyń jobasy ázirlenip jatyr. Ol balalardyń múddesin jan-jaqty eskeretin 7 strategııalyq baǵytty qamtıdy (otbasy, bilim berý, medıtsınalyq qamtamasyz etý, áleýmettik qorǵaý, quqyqtyq qorǵaý, qaýipsiz orta qurý, bos ýaqytyn uıymdastyrý jáne sport). – dedi mınıstr.
Onyń sózine qaraǵanda, bilim berý uıymdarynda qaýipsizdikti qamtamasyz etý baǵytynda 11 myń 800-ge jýyq bilim berý uıymy qaýipsizdik júıelerimen qamtamasyz etilýi tıis (oqýshylar men qyzmetkerler sany 100-den asatyn uıymdar). Qazirgi kezde elimiz boıynsha memlekettik jáne jeke bilim berý uıymdaryn qaýipsizdik júıelerimen jaraqtandyrýdyń ortasha kórsetkishi kelesideı:
- 98% uıymdarda týrnıketter;
- 96% -ynda dabyl túımesi ornatylǵan;
- 81%-y polıtsııanyń jedel basqarý ortalyqtaryna qosylǵan.
- 97%-ynda lıtsenzııalanǵan kúzetpen shart jasalǵan. Bıyl kúzetshilerge qoıylatyn biliktilik talaptary kúsheıtildi.
- Atalǵan kórsetkishterdiń oryndalýy Іshki ister mınıstrligi tarapynan tekserilip otyrady. Osy oraıda Jambyl, Túrkistan, Almaty jáne Atyraý oblystarynyń ákimderi jumysty kúsheıtý qajet, - dedi vedomstvo basshysy.
Budan buryn habarlanǵandaı, bıyl balabaqshalar vaýcherlik qarjylandyrý júıesine ótedi.