Jyl sońyna deıin ınklıýzıvti saıasat tujyrymdamasy qabyldanady

ASTANA. KAZINFORM – 15 qarashaǵa deıin ınklıýzıvti saıasat jónindegi tujyrymdama Úkimettiń qaraýyna engiziledi.

«Innovatsııalyq tehnologııalardy ázirleý jáne olardy áleýmettik qamsyzdandyrý men qorǵaý júıesine engizý óte ózekti másele. Múgedek jandardyń barlyq máselesi Memleket basshysynyń tapsyrmasy boıynsha ázirlenip jatqan ınklıýzıvti saıasat jónindegi tujyrymdamada kórinis tabýǵa tıis. Bul qujat jeltoqsan aıynda qabyldanýy kerek. Sondyqtan Eńbek jáne halyqty áleýmettik qorǵaý mınıstrligi 15-shi qarashaǵa qaraı tujyrymdama jobasyn Úkimetke engizýi qajet», - dedi Úkimet basshysy Oljas Bektenov vedomstvo otyrysynda.

Sondaı-aq, Premer-mınıstr múgedek jandardyń turmys sapasyn jaqsartý máseleleri ortalyq jáne jergilikti memlekettik organdardyń birinshi basshylarynyń turaqty baqylaýynda bolýy kerektigin eske saldy.

«Medıtsınalyq-áleýmettik saraptama sapasyn odan ári jaqsartý úshin densaýlyq saqtaý jáne eńbek salasyndaǵy aqparattyq júıelerdi tolyq ıntegratsııalaý qajet. Sondyqtan Densaýlyq saqtaý mınıstrligi men Eńbek jáne halyqty áleýmettik qorǵaý mınıstrlikterine atalǵan jumysty jyl sońyna deıin aıaqtaýdy tapsyramyn», - dep tolyqtyrdy O. Bektenov.

Buǵan deıin Premer-mınıstr ákimder men mınıstrlerge múgedek jandardyń máselesin sheship, jaǵdaı jasaýda shtattan tys keńesshimen jumys isteý ıdeıasyn usyndy. 

Odan bólek, Úkimet basshysy múgedek jandar úshin jasalyp jatqan jumystardy mardymsyz dep baǵalady. 

Aıta ketsek, memlekettik organdarǵa jyl basynan beri múgedek jandardan 16 myńnan astam aryz-shaǵym túsken.