Jyl sońyna deıin elde 85 mekteptiń qurylysy aıaqtalady

ASTANA. KAZINFORM — «Halyqtyq qurylys» baǵdarlamasy aıasynda bes óńirde 21 nysan salynady. Bul týraly búgin Quryltaıdaǵy Úkimet saǵatynda Oqý-aǵartý mınıstri Juldyz Súleımenova aıtty.

Kókshetaý qalasynyń Chaıkıno aýylynda 120 oryndyq jańa mektep ashyldy
Foto: Aqmola oblysy ákimdigi

- Memleket basshysy Qasym-Jomart Toqaevtyń bastamasymen 460 myń oqýshy ornyna arnalǵan 217 «Keleshek mektebi» salyndy. Onyń 84-i aýyldyq jerde ornalasqan. Ulttyq joba 12 apatty jáne 54 úsh aýysymdy mektep máselesin túbegeıli sheshti. Sońǵy 7 jylda elimizde 1 342 mektep salynyp, 5 myńnan astam aýyl mektebi jańǵyrtyldy jáne 7 myńnan astam zamanaýı pándik kabınet ashyldy. Qazir 59,3 myń oqýshy ornyna arnalǵan 101 mektep salynyp jatyr, 85-i bıyl, qalǵan 16-sy 2027 jyly aıaqtalady. Salynyp jatqan mekteptiń 56-sy aýyldyq jerlerde ornalasqanyn erekshe atap ótkim keledi, - dedi Juldyz Súleımenova.

Onyń aıtýynsha, Prezıdenttiń bıylǵy Joldaýyndaǵy tapsyrmaǵa sáıkes, «Halyqtyq qurylys» baǵdarlamasy aıasynda bes óńirdegi
21 nysan bilim berý nysanyn salý qarastyrylǵan. Mektepterdiń materıaldyq-tehnıkalyq bazasyn nyǵaıtý jalǵasyp keledi. 2026 jyly 1 688 zamanaýı pándik kabınet satyp alý josparlanǵan. Búginde 1 375 kabınet alyndy.

- 178 mektepke kúrdeli jóndeý júrgizilýde, onyń 91-i aýyl mektebi. Búginde 133 mektepte jóndeý jumysy aıaqtaldy, - dedi mınıstr.

Buǵan deıin habarlanǵandaı, mektepterdegi beınebaqylaý júıesine jasandy ıntellektini engizý bastaldy.