Jyl sońyna deıin 6 myńǵa jýyq pedagog qarjylyq saýattylyǵyn arttyrady

ASTANA. KAZINFORM —  Memleket basshysynyń tapsyrmasymen muǵalimder men oqýshylardyń qarjylyq saýattylyǵyn kóterýge arnalǵan aýqymdy joba iske qosyldy. Bastamany QR Oqý-aǵartý mınıstrliginiń «Órleý» biliktilikti arttyrý ulttyq ortalyǵy men QR Ulttyq banki birlesip iske asyrady. 

Vedomstvonyń málimetinshe, joba birneshe kezeńnen turady. Aldymen «Órleý» trenerleri Ulttyq banktiń 100 óńirlik fılıalynyń qyzmetkerlerin zamanaýı oqytý ádisterine úıretedi. Baǵdarlama koýchıng pen fasılıtatsııa, toptyq jumys, ulttyq qarjy júıesi, ınvestıtsııa jáne qarjyny basqarýdyń qazirgi tásilderin qamtıdy. 

— Qyrkúıekten bastap mektep pen kolledjderde «Jahandyq quzyrettilik» pánin oqytatyn 6 myńǵa jýyq muǵalim bes kúndik kýrstan ótedi. 2026 jyly taǵy shamamen 4 myń pedagog qamtylmaq. Baǵdarlama ustazdarǵa qarjylyq mádenıetti oqý úderisine engizýge, al oqýshylar men stýdentterge qarjyny tıimdi basqarý daǵdylaryn darytýǵa jol ashady, — delingen habarlamada. 

Bul joba — qarjylyq saýattylyqty ulttyq bilim berý júıesine engizýdiń mańyzdy qadamy. Ol qarjy pıramıdalary men alaıaqtyqtyń aldyn alyp, azamattardyń qarjylyq qaýipsizdigin kúsheıtýge baǵyttalǵan. «Órleý» men Ulttyq banktiń seriktestigi pedagogterdiń kásibı damýyn qoldap, jas urpaqqa jeke qarjyny saýatty basqarýǵa qajetti zamanaýı bilim beredi.