Jyl sońyna deıin 5 ótkizý pýnkti iske qosylady

ASTANA. KAZINFORM – Kelesi jyly «Nur Joly» ótkizý pýnktinen jylyna 5 mln-ǵa deıin kólik ótetin bolady. Bul týraly Úkimet otyrysynda Qarjy mınıstri Mádı Tákıev aıtty. 

– Kedendik ınfraqurylymdy jańǵyrtý boıynsha búginde 9 ótkizý pýnkti boıynsha jańartý jumystary aıaqtalyp jatyr. 4 ótkizý pýnkti paıdalanýǵa berildi. Olardyń ekeýi Qytaımen, ekeýi Ózbekstanmen shekarada tur. Osy jumada «Qazyǵurt» jáne «Temir baba», al 25 jeltoqsanda «Tájen», «Maıqapshaǵaı», «Baqty» ótkizý pýnktteri iske qosylady. Osylaısha, Memleket basshysynyń tapsyrmasy tolyq oryndalady, - dedi ol.

Onyń aıtýynsha, Ózbekstanmen shekaradaǵy «Jibek joly» jolaýshylar ótkizý pýnktine rekonstrýktsııalaý júrgizilip jatyr. Táýligine 70 myń adamǵa deıin jáne 2 myń kólikke deıin ulǵaıtylady. 

– «Nur Joly» ótkizý pýnktin táýlik boıy jumys rejımine aýystyrý pılottyq jobasy engizildi. Nátıjesinde avtokólik aǵyny 2 ese ósip, táýligine 1 800 kólikti qurap, 453 myń kólikke jetti. Jalpy kelesi jyldan bastap ótkizý qabiletin 6 esege kóterip, 5 mln-ǵa deıin kólik quralyn ótkizýdi kútýdemiz, - dedi ol.

Aıta keteıik, elimiz arqyly ótetin konteınerlik poıyzdardyń trazıttik deklaratsııalaryn rásimdeý 30 mınýtqa deıin qysqardy.