Jyl sońyna deıin 300 myńnan astam adam gazben qamtylady – Roman Sklıar
ASTANA. KAZINFORM – Ótken jyly halyqtyń 60 paıyzy gazben qamtylǵan. Al bıyl gaz jelilerin jańǵyrtýǵa 194 mlrd teńge bólindi. Bul týraly QR Premer-Mınıstrdiń birinshi orynbasary Roman Sklıar málim etti.
«2023 jyldyń qorytyndysy boıynsha halyqtyń 60 paıyzy gazben qamtylǵan. Jyl sońyna deıin 300 myńnan astam adam gazben qamtamasyz etilip, 1 myń 700 shaqyrymnan astam gaz jelileri jańǵyrtylatyn bolady, oǵan 194 mlrd teńge bólindi. «Beıneý – Bozoı – Shymkent 2», «Aqtóbe – Qostanaı» jáne «Taldyqorǵan – Úsharal» gaz qubyrlaryn salýǵa daıyndyq jumystary júrgizilýde», - dedi Roman Sklıar Úkimet otyrysynda.
Úkimet basshysynyń birinshi orynbasary qazir gaz óńdeý zaýyttary boıynsha Qashaǵanda qýaty 1 jáne 2 jarym mlrd tekshe metr bolatyn 2 zaýyt salynyp jatqanyn aıtty. Olardy 2026 jáne 2030 jyldary paıdalanýǵa berý josparlanǵan.
«Qarashyǵanaqta qýaty 4 mlrd tekshe metr bolatyn gaz óndirý zaýytyn 2028 jyly iske qosý josparlanyp otyr. Búginde áleýetti merdiger anyqtaldy. Jańaózende gaz óńdeý zaýyty boıynsha joba-smetalyq qujattaryn ázirleý bastaldy, dala jumystary júrgizilýde. 2027 jyly qoldanysqa engizý josparlanyp otyr», - deıdi ol.
