Jyl sońyna deıin 30 myń memqyzmetshi jasandy ıntellektiniń alǵyshartyn meńgeredi
SAMARQAND. KAZINFORM – Ózbekstannyń Samarqand qalasynda Birikken Ulttar Uıymynyń Memlekettik qyzmet forýmy ótip jatyr, dep habarlaıdy Kazinform agenttiginiń menshikti tilshisi.
Aýqymdy is-sharaǵa Ortalyq Azııa, Eýropa, Latyn Amerıkasy jáne Afrıka elderinen kelgen mınıstrler men ózge de laýazymdy memlekettik qyzmetshiler qatysyp jatyr.
Delegattar memlekettik qyzmet salasyn tsıfrlandyrý jáne salaǵa jasandy ıntellektini engizý múmkindikterin talqylaıdy.
Osy rette forýmǵa qatysyp jatqan QR Prezıdenti janyndaǵy Memlekettik basqarý akademııasynyń rektory Azamat Jolmanov Kazinform tilshisine suhbat berip, elimizde atqarylyp jatqan jumystar jaıly baıandady.
- Bizdiń akademııada jasandy ıntellekt zerthanasy quryldy. Onda biz túrli platformalarǵa taldaý jasaımyz. 2029 jylǵa deıin Memlekettik qyzmetti damytý tujyrymdamasynda bizge júktelgen naqty mindetter jazylǵan. Onyń ishinde salany tsıfrlandyrý basym baǵyt retinde aıqyndalǵan. Qazir osy tóńirektegi máselelerdi retteıtin jańa zań jobasy ázirlenip jatyr, - dedi Azamat Jolmanov Kazinform tilshisiniń saýalyna jaýap bere otyryp.
Spıker atap ótkendeı, bıyl Memlekettik basqarý akademııasynyń oqý baǵdarlamasy jańa pánmen tolyqty. Atap aıtqanda, bilim ordasy endi tsıfrlyq platformalarmen jumys isteıtin mamandardy daıarlaýǵa kiristi.
- Bıyl biz oqý baǵdarlamasyna «Tsıfrlyq memlekettik basqarý» pánin engizdik. Bul mamandar salany tsıfrlandyrýǵa qajetti platformalarmen jumys istemek. Sonymen qatar olar kıberqaýipsizdik máselelerin sheshýge de jumyldyrylady. Memlekettik qyzmet isteri agenttigimen Tsıfrlyq damý, ınnovatsııalar jáne aeroǵarysh ónerkásibi mınıstrligi birlesip, memlekettik qyzmetshilerdi jasandy ıntellektimen jumys isteýge úıretetin baǵdarlama ázirledi. Bizdiń maqsat – 3 jylda barlyq 90 myń memqyzmetkerdi osyǵan úıretý. Búginge deıin shamamen 1700 adam oqýdy támamdady. Jyl sońyna deıin 25-30 myń memqyzmetshi jasandy ıntellektimen jumys alǵysharttaryn meńgeredi dep josparlap otyrmyz, - dep toqtaldy Azamat Jolmanov.
Eske salaıyq, buǵan deıin Qazaqstanda memlekettik qyzmetshilerge arnalǵan jasandy ıntellekt kýrsy bastalǵanyn jazyp edik.
Osy ýaqytqa deıin elimizde oqýshydan memlekettik qyzmetshige deıin jasandy ıntellektini meńgeretinin jáne onyń mańyzy týraly jazǵan edik.