Jyl sońyna deıin 105 gıdrotehnıkalyq nysanǵa kópfaktorly zertteý júrgiziledi
ASTANA. KAZINFORM – Qazaqstan Respýblıkasynyń sý salasyn damytýdyń keshendi jospary aıasynda jyl sońyna deıin 105 gıdrotehnıkalyq nysanǵa kópfaktorly zertteý júrgizý josparlanyp otyr.
Jergilikti atqarýshy organdar kommýnaldyq menshiktegi 69 nysandy tekserýdi kózdep otyr. Al «Qazsýshar» RMK respýblıkalyq menshiktegi 35 gıdrotehnıkalyq nysan men «Dostyq» memleketaralyq gıdrotorabynda kópfaktorly zertteý júrgizýdi josparlap otyr.
Eske salsaq, 2024 jyly josparlanǵan 82 nysannyń ornyna 84 gıdrotehnıkalyq nysanǵa kópfaktorly zertteý júrgizilgen bolatyn. Al 2025 jyly kommýnaldyq menshiktegi 28 jáne respýblıkalyq menshiktegi 28 nysannan turatyn jalpy sany 56 gıdrotehnıkalyq qurylys tekserildi.
Kópfaktorly zertteý sý sharýashylyǵy nysandarynyń qaýipsizdigin baqylaý jáne qamtamasyz etý úshin júrgiziledi. Ýaqytyly tekserýler jóndeýdi qajet etetin nysandardy anyqtaýǵa, sondaı-aq apattar men bógetterdiń buzylý qaýpiniń aldyn alýǵa múmkindik beredi. Zertteý qorytyndysy boıynsha nysannyń qaýipsizdik deklaratsııasy ázirlenip, táýelsiz saraptamaǵa joldanady.
– Qazaqstan Respýblıkasynyń sý salasyn damytýdyń 2024-2028 jyldarǵa arnalǵan keshendi jospary sheńberinde jalpy sany 557 gıdrotehnıkalyq nysanǵa kópfaktorly zertteý júrgizý kózdelgen. Sý kodeksine sáıkes gıdrotehnıkalyq qurylystardyń qaýipsiz jumysyn qamtamasyz etý úshin mundaı zertteýler ár bes jyl saıyn júrgizilýi tıis. Bul merzim aldyńǵy tekserýdiń tirkelgen kúninen bastap naqty esepteledi, - dedi SRIM Sý sharýashylyǵy ımarattaryn damytý departamentiniń dırektory Saǵı Útelov.
Eske sala keteıik, budan buryn Ulytaý oblysynda gıdrotehnıkalyq qurylystar memleket menshigine qaıtarylǵanyn jazǵanbyz.
