Jyl saıyn jatyr moıny obyrynan 600-ge jýyq áıel kóz jumady
ASTANA. KAZINFORM – Elde jyl saıyn jatyr moıny obyrynan shamamen 600 áıel qaıtys bolady. Bul dert áıelder arasyndaǵy onkologııalyq aýrýlar qurylymynda ekinshi orynda tur.
Bul týraly Astana qalasynyń sanıtarııalyq-epıdemıologııalyq baqylaý departamentiniń basshysy Aıgúl Shaǵaltaeva Óńirlik kommýnıkatsııalar qyzmetinde ótken brıfıngte málim etti.
Onyń aıtýynsha, jatyr moıny obyrynyń negizgi sebebi – adam papıllomasy vırýsy (APV).
– Adam papıllomasy vırýsyna qarsy vaktsınatsııanyń basty maqsaty – jatyr moıny obyrynyń aldyn alý. APV ınfektsııasy osy aýrýdyń negizgi sebebi sanalady. Qazaqstanda jatyr moıny obyry áıelder arasyndaǵy onkologııalyq aýrýlar qurylymynda ekinshi orynda tur. Jyl saıyn bul dertten shamamen 600 áıel kóz jumady, – dedi Aıgúl Shaǵaltaeva.
Spıkerdiń sózinshe, elimizde qoldanylyp júrgen AQSh-ta óndirilgen tórt valentti «Gardasıl» vaktsınasy adam papıllomasy vırýsynyń 6, 11, 16 jáne 18 tıpterinen qorǵaıdy. Onyń ishinde 16 jáne 18 tıpteri jatyr moıny obyrynyń damý qaýpi joǵary vırýstardyń qataryna jatady.
Aıgúl Shaǵaltaevanyń aıtýynsha, vaktsına quramynda tiri vırýs bolmaıdy. Sondyqtan ol aýrý juqtyrmaıdy. Ekpe salynǵannan keıin ıne egilgen jerdiń qyzarýy nemese dene qyzýynyń azdap kóterilýi sııaqty qysqa merzimdi reaktsııalar bolýy múmkin. Mamandar muny qalypty ımmýndyq jaýap dep baǵalaıdy.
Sondaı-aq halyqaralyq ǵylymı zertteýler APV-ǵa qarsy vaktsınanyń qaýipsizdigi men tıimdiligin dáleldegen.
Eske salaıyq, buǵan deıin elimizde ókpe obyryn erte anyqtaýǵa arnalǵan jańa skrınıng baǵdarlamasy iske qosylatyny habarlanǵan bolatyn.
