Jyl saıyn turmystyq zorlyq-zombylyq týraly 100 myńnan asa habarlama túsedi — ІІM

ASTANA. KAZINFORM — Elimizde jyl saıyn polıtsııaǵa turmystyq zorlyq-zombylyq týraly 100 myńnan astam habarlama túsedi. 

Bul týraly Іshki ister mınıstrliginiń Ákimshilik polıtsııa komıteti tóraǵasynyń orynbasary, polıtsııa polkovnıgi Renat Zulqaıyrov aıtty.

— Otbasyndaǵy turmystyq zorlyq-zombylyq problemasy tek Qazaqstanda ǵana emes búkil álemde ózekti. Polıtsııa aldyn alýdyń tolyqqandy keshendi is-sharalaryn qabyldaıdy. Degenmen, statıstıka kórsetip otyrǵandaı, jyl saıyn polıtsııaǵa turmystyq zorlyq-zombylyq týraly 100 myńnan astam habarlama túsedi. Jaǵdaıdy túzetý úshin ótken jyly Memleket basshysy áıelder men balalardyń qaýipsizdigin qamtamasyz etý máseleleri týraly zańǵa qol qoıdy, — dedi ol Ortalyq kommýnıkatsııalar qyzmetindegi brıfıngte.

Onyń atap ótýinshe, áıelder men balalarǵa qatysty jasalǵan zorlyq-zombylyq úshin jaýapkershilik kúsheıtildi. Atap aıtqanda, kámeletke tolmaǵandarǵa jasalǵan zorlyq-zombylyq qylmysy úshin tatýlasý múmkindigi joıyldy. Kámeletke tolmaǵan balany zorlaǵandar ómir boıy bas bostandyǵynan aıyrylady. Urlaý jáne bas bostandyǵyn zańsyz aıyrǵandarǵa jaýapkershilik kúsheıtildi. 16 jasqa tolmaǵandarǵa jynystyq sıpatta qylmyńdaǵandarǵa qylmystyq jaýapkershilik engizildi. Densaýlyqqa qasaqana jeńil jaraqat salý jáne uryp-soǵý qylmysqa jatqyzyldy.

— Nátıjesinde 2024 jyldyń qorytyndysynda elimizde uryp-soǵý jáne densaýlyqqa jeńil zaqym keltirý boıynsha shamamen 7 myń qylmystyq is tirkeldi. Esterińizge sala ketsem, buryn mundaı áreket úshin ákimshilik jaýapkershilik bar bolatyn. Osylaısha, asa aýyr turmystyq qylmys 2,2 paıyzǵa, onyń ishinde adam óltirý — 6,4, densaýlyqqa asa aýyr zııan keltirý — 25,5, ortasha aýyr zııan keltirý 12 paıyzǵa tómendedi, — dedi Renat Zulqaıyrov.

Eske salsaq, osyǵan deıin Atyraýda jyl basynan beri zorlyq-zombylyq deregimen 30 qylmystyq is tirkelgenin jazdyq.