Jyl saıyn paıdalanýǵa beriletin turǵyn úı kólemi 20 mln sharshy metrge jetti
ASTANA. KAZINFORM – Qazaqstanda turǵyn úımen qamtamasyz etilý deńgeıi artyp keledi. Keıingi úsh jyl ishinde bul kórsetkish bir adamǵa shaqqanda 23,8 sharshy metrden 25,2 sharshy metrge deıin ósken. Bul týraly «Otbasy bank» AQ basqarma tóraǵasy Lıazzat Ibragımova BIZDIÑ ORTA podkastynda málimdedi.
Sarapshynyń aıtýynsha, ósim belsendi turǵyn úı qurylysy men týý deńgeıiniń joǵary bolýymen baılanysty. Al azamattar úshin turǵyn úıdiń qoljetimdiligi depozıtterdiń rekordtyq ósýimen rastalady.
Lıazzat Ibragımovanyń túsindirýinshe, álemdik tájirıbede turǵyn úımen qamtamasyz etilý deńgeıin baǵalaıtyn kórsetkish bar. Ol eldegi turǵyn úı alańynyń jalpy kólemin halyq sanyna bólý arqyly esepteıdi eken.
– Qazaqstanda bul kórsetkish sońǵy úsh jylda bir adamǵa shaqqanda 23,8 sharshy metrden 25,2 sharshy metrge deıin ósken. Bul ósim formýlanyń alym bóliginiń ulǵaıýymen baılanysty: jyl saıyn shamamen 20 mln sharshy metr turǵyn úı paıdalanýǵa beriledi, - dep atap ótti Lázzat Ibragımova.
Sonymen qatar, elde halyq sany kóbeıip keledi. Qazaqstanda 2021–2022 jyldary sharyqtaý kezeńinde jylyna 450 myńǵa deıin bala dúnıege kelgen. Sońǵy jyldary bul kórsetkish tómendegenimen, áli de aıtarlyqtaı deńgeıde saqtalyp otyr.
Osylaısha, turǵyn úımen qamtamasyz etý – mańyzdy makroekonomıkalyq kórsetkish. Alaıda qarapaıym azamat úshin ol kóbine statıstıkalyq derek kúıinde qalyp otyr. Halyqty kóbirek alańdatatyny – jalaqy deńgeıi men bir sharshy metr turǵyn úı baǵasy.
Spıkerdiń aıtýynsha, bul kórsetkish boıynsha da jaǵdaı jaman emes.
– Keıingi eki jylda jalaqy deńgeıiniń ósýi baıqalyp otyr. Sonymen qatar turǵyn úı naryǵy qazirgi tańda mynadaı kezeńde: qaıtalama naryqtaǵy turǵyn úılerdiń baǵasy keı jaǵdaıda tómendese, alǵashqy naryqtaǵy baspana quny kerisinshe ósip keledi, - dedi ol.
2025 jyldyń sońynda turǵyn úı naryǵynda qarqyndy belsendilik baıqaldy. Sebebi, turǵyn úıge qosymsha qun salyǵy engiziledi degen aqparat taraǵan edi. Osyǵan baılanysty jeltoqsan aıynda jasalǵan mámileler sany rekordtyq deńgeıge jetken.
– Shyn máninde Qurylys kodeksine sáıkes turǵyn úıge QQS tek 2027 jyldyń sońynda engiziledi. 2025 jyldyń 31 jeltoqsanyna deıin ruqsat alǵan barlyq nysandar endi ǵana salynyp jatyr jáne dál osy obektilerge QQS salynady. Al buǵan deıin salynyp, qazir satylyp jatqan turǵyn úılerge QQS qoldanylmaıdy, - dep túsindirdi Lázzat Ibragımova.
Sarapshy turǵyn úıdiń qoljetimdiligi týraly suraqqa da jaýap berdi. Ol 2021–2024 jyldar aralyǵynda bankterge túsetin qarajat kólemi jyl saıyn shamamen 1 trln teńgeni (940–980 mlrd teńge aralyǵy) quraǵanyn atap ótti.
– 2025 jyl rekordtyq kórsetkishpen erekshelendi. Bankterge tartylǵan qarajat kólemi 1,5 trln teńgege jetti. Azamattar azamattar 2% jyldyq mólsherlememen depozıtter ashyp, bolashaqta jeńildetilgen ıpoteka alý múmkindigi úshin jınaq jasaıdy, - dedi ol.
Onyń aıtýynsha, azamattardyń mundaı sanaly túrde áreket etýi turǵyn úıdiń qoljetimdiligi artqanyn kórsetedi.
Aıta keteıik, jyl basynan 3,9 mln sharshy metr turǵyn úı paıdalanýǵa berildi.
