Ortalyq Azııa arqyly jylyna 90 tonnaǵa jýyq geroın ótedi — Ózbekstannyń Qaýipsizdik keńesi
SAMARQAND. KAZINFORM — Sońǵy bes jylda Ortalyq Azııada esirtki qylmystarynyń sany 83 paıyzǵa ósti, dep habarlaıdy Kazinform agenttiginiń menshikti tilshisi.
Mundaı derekterdi Samarqandta ótip jatqan Esirtkige qarsy kúres jónindegi Ortalyq Azııa óńirlik aqparattyq úılestirý ortalyǵynyń otyrysynda Ózbekstan Qaýipsizdik keńesi hatshysynyń orynbasary Bahodır Tashmatov málim etti. Ol óz baıandamasynda búginde halyqaralyq qaýymdastyq jańa qaterlermen betpe-bet kelip jatqanyn atap ótti. Onyń aıtýynsha, uıymdasqan qylmystyq toptardyń jıi ózgeretin júıesi transulttyq qaýipterdi eseleı tústi.
— Qazirgi tańda bul baǵyttaǵy álemdik jaǵdaı óte kúrdeli. Biz jańa sıntetıkalyq preparattar men psıhotropty zattardyń taralý aýqymynyń ulǵaıǵanyn baıqap otyrmyz. Tek sońǵy bes jylda Ortalyq Azııada esirtki qylmystarynyń sany 83%-ǵa ósti. Kontrabanda — 55%, al tárkilengen preparattardyń kólemi — 52%, sıntetıkalyq esirtkiniń, ońyń ishinde metamfetamınniń zańsyz aınalymy 62%-ǵa artty, — dedi Bahodır Tashmatov baıandama jasaı otyryp.
Onyń sózinshe, Ortalyq Azııa aımaǵy uzaq jyldar boıy qoldanylyp kele jatqan jahandyq esirtki trafıginiń negizgi tranzıt dálizi sanalady.
— Jyl saıyn óńir arqyly 90 tonnaǵa jýyq geroın ótedi, onyń edáýir bóligi Reseı men Eýropaǵa baǵyttalady. Alaıda, búginde qaýip tek tranzıtpen shektelmeıdi. Atap aıtqanda, ishki óndiris ýaqyt ótken saıyn aryp barady. Keıingi bes jylda aımaqta sıntetıkalyq esirtki óndiretin jasyryn zerthanalardyń sany 111%-ǵa ósip, 331-ge jetti. Ózbekstanda 2024 jyly osyndaı bes zerthana anyqtalsa, bıyl 9 aıda olardyń sany 10-ǵa teńeldi. Bul búkil aımaq úshin qaýiptiń eselene túskenin aıǵaqtaıdy, — dep toqtaldy B.Tashmatov.
Buǵan deıin habarlaǵanymyzdaı, keıingi 5 jylda Ózbekstanda tárkilengen sıntetıkalyq esirtki kólemi 80 ese ósken.
Eske salaıyq, taıaýda Ózbekstan bıligi esirtki qylmystaryna qarsy kúrestiń 2025-2026 jyldarǵa arnalǵan ulttyq baǵdarlamasyn qabyldady.
Sondaı-aq, birneshe kún buryn Ózbekstan prezıdenti Shavkat Mırzıeev veıp, oǵan arnalǵan hosh ıistendirgish pen suıyqtyq ákelýge, satýǵa jáne taratýǵa tyıym salatyn zańǵa qol qoıdy.