Jyl saıyn myńǵa jýyq bala jazataıym oqıǵadan qaıtys bolady — travmatolog

ASTANA. KAZINFORM — Jyl saıyn 0-17 jastaǵy balalar arasynda 182 myńnan astam jazataıym oqıǵa men jaraqat tirkeledi. Bul árbir 10-ynshy bala kem degende bir ret jaraqat alatynyn bildiredi.

QR Densaýlyq saqtaý mınıstrliginiń shtattan tys bas balalar travmatologi Arslan Dúısenbaev munyń bári eresekterdiń baqylaýynyń jetkiliksizdiginen ekenin aıtyp otyr.

Balalar jaraqatynyń jartysyna jýyǵy turmystyq jaǵdaıda (40%) bolady, shamamen 10% — jol-kólik jaraqattary bolsa, 5% — sportta, 5% — joǵary bıiktikten qulap, taǵy 5% — sýǵa batý, órt, ýlaný saldarynan jaraqat alady.

— Balalar jaraqatynyń 1,2%-dan astamy múgedektikke ákeledi. Basqasha aıtqanda, jyl saıyn jaraqat alǵan 200 myń balanyń 2,4 myńǵa jýyǵy ómir boıy múgedek bolyp qalady. Qazaqstanda syrtqy sebepterden (jaraqattanýdan, jazataıym oqıǵalardan, ýlanýdan) balalardyń ólim deńgeıi halyqaralyq standarttar boıynsha joǵary bolyp qala beredi. Jyl saıyn jaraqattar myńǵa jýyq balanyń ómirin qııady, — dedi Arslan Dúısenbaev Ortalyq kommýnıkatsııalar qyzmetinde ótken baspasóz qyzmetinde.

Qazaqstanda balalar jaraqattarynyń eń kóp taraǵan túrleri — aıaq-qoldyń zaqymdanýy jáne bas jaraqaty. Statıstıkaǵa sáıkes, balalardyń barlyq jaraqattarynyń shamamen 75%-y qol men aıaqtyń jaraqattarynan turady. Taǵy 12%-y bas pen moıyn jaraqattaryna tıesili. Qalǵan 13% — omyrtqanyń synýy, ishki aǵzalardyń jaraqattary, qatty kúıikter, ýlaný sekildi basqa jaraqattardy qamtıdy.

— Balalarmen bolǵan qaıǵyly jaǵdaılardyń 80%-y eresekterdiń kinásinen bolady. 2019-2024 jyldary jaraqattar elimizde 6 myńǵa jýyq qazaqstandyq balanyń ómirin qıdy, — dedi shtattan tys balalar travmatologi.

Aıta keteıik, 2021 jyldan beri «Ańsaǵan sábı» baǵdarlamasy aıasynda 30 myńnan astam áıelge EKO jasalyp, kópten kútken 10 myń sábı dúnıege keldi.