Jyl saıyn 5 myńǵa jýyq jasóspirim quqyq buzǵany úshin polıtsııaǵa jetkiziledi
ASTANA. KAZINFORM – Jasóspirimderdiń quqyq buzýshylyǵynyń aldyn alýǵa baǵyttalǵan jańa zań jobasy ázirlendi. Bul týraly ІІM Ákimshilik polıtsııa komıtetiniń basqarma bastyǵy Áset Ospanov aıtty.
- Mınıstrlik quqyq buzýshylyqtardyń, onyń ishinde jasóspirimder qylmysy salasyndaǵy quqyq buzýshylyqtardyń aldyn alýǵa baǵyttalǵan jańa zań jobasyn ázirledi. Osy zań jobasy aıasynda kámeletke tolmaǵandarǵa quqyqtyq, áleýmettik, psıhologııalyq jáne pedagogıkalyq kómek kórsetý jónindegi memlekettik organdardyń quzyreti qaıta qaralady. ІІO profılaktıkalyq baqylaýyna jatatyn adamdardyń sanattary jańartylady. Zań jobasy Májilis depýtattarynyń qaraýyna engizildi, - dedi ol mınıstrliktiń baspasóz qyzmeti alańynda ótken brıfıngte.
Onyń aıtýynsha, zańnamamen qatar balalardyń quqyqtaryn qorǵaýǵa baǵyttalǵan tájirıelik sharalar da qabyldanyp jatyr.
- Jyl saıyn polıtsııa organdaryna túrli quqyqbuzýshylyqtar úshin 5 myńǵa jýyq kámeletke tolmaǵandar jetkiziledi. Ótken jyly balalary turǵyn úıden tys jerde jáne túngi ýaqytta oıyn-saýyq oryndarynda bolǵany úshin ákimshilik jaýapkershilikke 112 myń ata-ana men 2,5 myńǵa jýyq kásipker, osy jyldyń úsh aıynda 29 myń ata-ana jáne 800-den astam bıznes ıeleri tartyldy, - dedi Áset Ospanov.
Buǵan deıin Aqtóbede qarý kezenip, fotoǵa túsken, keıin ony áleýmettik jelige júktegen bir top jasóspirim anyqtalǵanyn jazǵan edik.