Jyl saıyn 3 myńǵa jýyq talapker memlekettik granttan bas tartady
ASTANA. KAZINFORM — Qazaqstanda jyl saıyn shamamen 3 myń talapker memlekettik bilim grantynan bas tartady. Bosaǵan granttar keıin konkýrsqa qatysqan ózge talapkerler arasynda qaıta bólinedi. Bul týraly QR Ǵylym jáne joǵary bilim mınıstrligi Joǵary jáne joǵary oqý ornynan keıingi bilim berý komıteti basqarmasynyń basshysy Jandáýlet Qudaıbergenov Jibek Joly telearnasynyń «Búgin Live» baǵdarlamasynda aıtty.
Onyń aıtýynsha, respýblıkalyq bıýdjet esebinen bólinetin memlekettik bilim granttaryna konkýrs 20 shildege deıin jalǵasady. Al onyń qorytyndysy 10 tamyzǵa deıin jarııalanady.
— Tájirıbe kórsetkendeı, jyl saıyn shamamen 3 myń memlekettik bilim granty bosaıdy. Onyń negizgi sebebi — grant ıegerleriniń bir bóligi sheteldik joǵary oqý oryndaryna túsedi, endi biri merzimdi áskerı qyzmetke shaqyrylady nemese túrli jeke jaǵdaılarǵa baılanysty oqýyn jalǵastyrmaıdy, — dedi Jandáýlet Qudaıbergenov.
Onyń sózinshe, negizgi konkýrs aıaqtalǵannan keıin bos qalǵan granttar qaıta úlestiriledi.
— 10 tamyzdan keıin bas tartylǵan granttardyń tizimi qalyptastyrylyp, tamyz aıynyń ortasynan qyrkúıektiń basyna deıin qaıta konkýrs ótkiziledi. Bul rette talapkerlerden qosymsha qujat talap etilmeıdi. Sebebi olar negizgi konkýrsqa qatysqan kezde barlyq qajetti qujatty ótkizgen, — dedi komıtet basqarmasynyń basshysy.
Bosaǵan granttar negizgi konkýrsqa qatysqan talapkerler arasynda UBT nátıjesi men konkýrstyq irikteý qorytyndysyna sáıkes qaıta bólinedi.
— Osylaısha memlekettik grantqa óte almaǵan talapkerlerge taǵy bir múmkindik beriledi, — dedi ol.
Eske salaıyq, bıylǵy negizgi UBT 10 mamyr men 10 shilde aralyǵynda ótti. Testileýge 233 myń talapker qatysyp, eki múmkindigin qosa eseptegende test 422 myń ret tapsyryldy.
