Jyl saıyn 100 adamdy súıek kemigi donorlarynyń ulttyq tirkelimine tirkeımiz – maman

AQTÓBE. KAZINFORM – Aqtóbelik mamandar jyl saıyn 100 donordy tirkeýge mindetti. Qan quramy Astanada tekserilip, jaramdy bolsa tizimge alynady.

Elde súıek kemigi donorlaryn tabý qıyn. Sondyqtan ár óńir jyl saıyn 100 donordy tizimge alýǵa mindettelgen. Donor tizimge engizilgenimen, onyń sáıkes kelýi 10 myńnan bir, tipti mıllıonnan bir bolyp keledi. 2018 jyldan beri elimizde týys emes allogendik 15 transplantatsııa jasaldy. Onyń 11-i qazaqstandyq, 3-i Reseı, al bireýi Italııa azamatyna jasaldy. 

- Gemopoezdik jasýshalardy damytý ortalyǵy elimizde 2011 jyly ashyldy. Sebebi elimizde jyl saıyn 300-ge jýyq adamǵa onkogematologııalyq dıagnoz qoıylady. Onyń jartysy – bala. Emi - gemopoezdik jasýshalardyń transplantatsııasy. Maqsat – donorlar sanyn kóbeıtý. Qazaqstan boıynsha tek 11 myńnan asa donor bar. Óńirlerge jyl saıyn jospar beriledi. Jyl saıyn 100 donor tirkelýi kerek. Kez kelgen adamnyń qany jaramaıdy. Adamdar qan ortalyǵyna kelip, 6-9 ml qan tapsyrady. Ony Astana qalasyna jiberemiz. Zertteý tek elimizdiń astanasynda ǵana júrgiziledi. Sáıkestik anyqtalsa, donorǵa habarlasady. Sáıkestik 10 myńnan bir, sırek fenotıp bolsa mıllıonnan biri ǵana, - dedi Aqtóbe oblystyq qan ortalyǵy gemopoezdik jasýshalarydyń donorlyǵyn damytý mamany Aısultan Abrashev. 

Bul transplantatsııa kezinde donor naýqastyń qanyn tolyq almastyrady. Mamandar bul transplantatsııa týraly áli de aqparat az degen pikirde. 

- Qazaqstanda diń jasýshalary týraly maǵlumat az. Ásirese jastar az biledi. Al transplantatsııa kezinde kóbine jastar donor bola alady. Stýdenttermen kezdesip, túsindirý jumysyn júrgizýdiń mańyzy osynda. Súıek kemigi donoryn tabý qıyn, al emniń osy túri naýqas úshin tıimdi, - dedi Marat Ospanov atyndaǵy Batys Qazaqstan medıtsına ýnıversıtetiniń dotsenti Ǵalymjan Isaev.

Eske salsaq, Almaty oblysynda qaıtys bolǵan donor 4 adamnyń ómirin saqtap qaldy.