Jyl qorytyndysy: «Taza Qazaqstan» aktsııasynda mıllıon tonnaǵa jýyq qoqys shyǵaryldy

ASTANA. KAZINFORM – Prezıdent bastamasymen qolǵa alynǵan «Taza Qazaqstan» ekologııalyq naýqanyna 2,4 mıllıon adam qatysyp, 2,5 mıllıon kóshet otyrǵyzyldy. Bul týraly QR Prezıdentiniń keńesshisi – Baspasóz hatshysy Berik Ýálı Egemen Qazaqstan gazetindegi maqalasynda jazdy.

Prezıdenttiń bastamasymen bıylǵy sáýir aıynda jalpyulttyq «Taza Qazaqstan» ekologııalyq aktsııasy bastalǵan edi. 

– Kóktemgi sý tasqynymen arpalysyp, daǵdarǵan shaq bolsa da, Prezıdent óńir ákimderine bosańsymaı, aınalany tazalaý, abattandyrý isine dereý kirisýge pármen berdi. Bul jalpyulttyq sıpat alatyn turaqty úderiske aınalýǵa tıis ekenin qatań eskertti. Túpki maqsat – qoǵamda ekologııalyq mádenıet qalyptastyrý, - deıdi B. Ýálı. 

Jyl boıy júrgizilgen aktsııaǵa 2,4 mıllıonǵa jýyq adam qatysty. Júzdegen myń aýla men aýmaq tazartylyp, 900 myń tonnadan asa qoqys shyǵaryldy. 

Shamamen 2,5 mıllıon kóshet otyrǵyzyldy, 20 myńnan asa áleýmettik nysannyń aýmaǵy, 4,6 myńnan asa qoǵamdyq oryndar, saıabaqtar, shaǵyn baqtar abattandyryldy. Bes myńnan asa tarıhı-mádenı nysan jáne 758 sýburqaq retke keltirildi. 

Ózender men kólderdiń jáne basqa da sý aıdyndarynyń aınalasyndaǵy 5,8 mıllıon sharshy metrden asa aýmaq, 8,4 mıllıon metrden asa aryq tazartyldy.

Buǵan deıin Kazinform agenttigi Úkimet qabyldaǵan «Taza Qazaqstan» ekologııalyq mádenıetti damytý tujyrymdamasyna analıtıkalyq sholý jasaǵan edi.

Aıta keteıik, Berik Ýálı Memleket basshysy Qasym-Jomart Toqaevtyń jyl boıy atqarǵan qyzmetine sholý jasap, qoǵamdyq-saıası ómirdegi, áleý¬mettik-ekonomıkalyq damý¬daǵy irgeli ózgerister men tabys-tar týraly baıandady.